«إحنا نقدر نغير الظروف».. رسائل الرئيس السيسى فى افتتاح مشاريع الإسكان البديل
افتتح الرئيس عبدالفتاح السيسي، اليوم، مجموعة مشروعات إسكان بديل المناطق غير الآمنة، من منطقة السادس من أكتوبر، حيث تأتي هذه الخطوة ضمن خطوات الدولة للتخلص من العشوائيات وتوفير مساكن آمنة لكل المصريين.
ووجّه الرئيس عبدالفتاح السيسي خلال افتتاح الإسكان البديل عدة رسائل للمصريين نرصدها في سياق السطور التالية:
"بناء 500 ألف وحدة سكنية"
أكد الرئيس عبدالفتاح السيسي، أن الدولة المصرية تخطط لبناء 500 ألف وحدة سكنية في عواصم المحافظات، لمواجهة البناء غير المخطط، قائلًا: "خلوا بالكم الـ 500 ألف وحدة سكنية بكام؟!.. الوحدة بـ 500 ألف جنيه يعنى كام.. يعنى 250 مليار جنيه.. ولما نعمل مليون وحدة يعنى 500 مليار جنيه.. والموضوع مش اقتصادى خالص".
"الحكومة بتعمل زي ما الكتاب بيقول"
وقال الرئيس السيسي: "بنعمل إسكان من 3 لـ 4 أدوار.. وبنعمل حظائر لكل شقة لمن يرغب في تربية الحيوانات.. فيه مكان جاهز مع الشقة.. علشان تعرفوا جادين في إننا نوفر للناس"، متابعًا: "مشروعات الإسكان اللى بنعملها متكاملة.. مش على الطوب الأحمر.. مفيش حد بيعمل كده إلا الحكومة ومفيش مطور عقارى بيعمل كده إلا في حالات معنية.. الحكومة بتعمل حاجة كاملة وزى الكتاب ما بيقول.. أرجو إنكم تساعدونا وخلال سنة أو اتنين أو 3 سنوات نكون خلصنا اللى بنتكلم فيه دلوقتى".
"بنصلح أوضاع قديمة"
وأشار الرئيس السيسي، إلى أن الحكومة من أجل تجهيز محور في منطقة الأمل تمت إزالة 2500 شقة وتوفير سكن بديل للسكان في مشروعى "أهالينا 1 وأهالينا 2"، وتم استكماله بشكل كامل حتى جاردينيا والتجمع الأول وطريق السويس، متابعًا: "إحنا بنعمل الصح للناس.. وبنسكن الناس في مكان مناسب ونسعى لتوفير مكان يوفر لهم فرص عمل.. ودى مش حلول إننا نقعد كده في كل مكان ودى تكاليف كبيرة علينا وعليكم.. ده فلوس المصريين.. بنقعد نصلح بها أوضاع قديمة خلال التطوير".
"التعدي على الأراضي الزراعية"
تساءل الرئيس عبدالفتاح السيسي، عن أسباب التعدى والبناء على الأراضى الزراعية، قائلًا: "عيب مين؟، يقولك المحليات مش قادرة، ما هو السبق بتاع التعدي كبير"، مضيفًا: "تقول إنت بتكرر الكلام، بكرره علشان أسجل مواقف على نفسى، وعلى والحكومة، وعليكم، لأن القضية مش بتاعتي لوحدى ولا الحكومة وحدها، دى قضية دولة".
"قضية المخلفات"
قال الرئيس: "المخلفات موضوع مشترك بين الدولة والمواطن..عمل المباني المخططة أقدر أعمل نظام صحى لإزالة المخلفات.. بقالنا 3 سنين نتفاوض مع شركات النظافة واتفقنا، لما جينا نتكلم مع الشركات والتنمية المحلية والبيئة تعرض عليا الموضوع لقينا حجم القضية، الدولة بتجمع من المواطنين مقابل النظافة 800 مليون جنيه، وتكلفته في القاهرة فقط 2.5 مليار جنيه".
وتابع الرئيس: "معندناش نظام فى المبانى هيبقى كفاءة أعمال النظافة مش هاتبقى بنفس المستوى، كنت ماشى من كام يوم في محور الفريق العصار، لقيت ناس رامية مخلفات فى نص الشارع، ولما حطينا عربيات صغيرة الناس رفضت إن العربيات تبقى موجودة جنبهم طيب هنعمل إيه؟".
"تطوير الريف المصري"
علق الرئيس عبدالفتاح السيسي، على بعض النماذج من عمليات تطوير الريف المصري قائلًا: "نريد تسليط الضوء على ذلك في جرايدنا ومجلاتنا والتليفزيون، ويكون فيه تغطية ليها.. خصوصًا أن ذلك الأمر يكون في الريف".
"إحنا نقدر نغير ظروفنا"
تحدث الرئيس السيسي، على ضرورة النهوض للأفضل، قائلًا: "مش عاوزين تحلموا لبلدكم ولأنفسكم ليه؟.. ليه راضيين بقالب طوب تحطوه وخلاص؟.. إحنا نقدر نغير ظروفنا، بدليل إننا بنقول لو دخلنا على قرية 100 بيت، دور واحد، نقدر نحسن ظروفهم ونطور منهم مثل تلك النماذج.. هتساعدونا لتقديم ذلك؟".
"تخطيط متكامل في الدلتا وسيناء"
استطرد السيسي: "وبالمناسبة في الدلتا الجديدة وسيناء هناك تخطيط متكامل، لأن أنا اللى بعمله.. لأننا بنخطط تخطيط متكامل في كل شيء، بحيث تتواجد كل الخدمات.. لكن في تلك المناطق نعالج أوضاع سابقة، لن تتعالج إلا بتضافر الجهود ونكون مع بعض عشان نغير حياتنا وعشان نحقق حلمنا.. مش عاوزين تحلموا معايا ليه بس؟".
"إتاحة شقق للمواطنين"
قال الرئيس عبدالفتاح السيسي، إن الدولة تسعى لإتاحة شقق لإسكان للمواطنين في نفس الوقت الذى تمنع فيه البناء على الأراضى الزراعية حتى نوفر البديل للمواطن، متابعًا: "لمنع المواطنين من البناء غير المخطط أو الأراضى الزراعية أطلقنا مشروعًا للإسكان فى عواصم المحافظات من خلال البناء على الأراضى المتاحة للبناء عليها سواء أراضى الدولة أو وزارات مثل قطاع الأعمال وغيرها مثل الأراضى التي لم تعد تصلح أنها تكون موجودة داخل الكتل السكانية.. وبالتالي يتم البناء عليها علشان مش أقول للمواطن مش تبنى وأنا مش بوفر بديل".
"ننفذ 108 آلاف وحدة سكنية"
وأضاف الرئيس السيسي: "ننفذ 108 آلاف وحدة سكنية ضمن هذا المشروع.. وكل ما تتوفر أراضى سواء من المحافظة أو غيره هنقدر نعمل الخطة على مستوى الدولة بالكامل".
"حل مشكلة القمامة"
تحدث الرئيس عبدالفتاح السيسي، عن ضرورة حل مشكلة المخلفات والقمامة، ومواجهة البناء غير المخطط، مشيرًا إلى أن حجم المخلفات يصل لـ 40 مليون طن، مستطردًا: "أي قضية اتكلمنا فيها نهتم بها كدولة وحكومة ومواطنين، ولا يمكن النجاح فيها إلا إذا كنا جميعًا مع بعضنا البعض".
"نحتاج برنامج نظافة جيد"
وواصل الرئيس السيسي حديثه: "نحتاج لعمل برنامج نظافة كويس.. وسنواجه مشكلة البناء غير المخطط.. وفي هذه الحالة أمامي خيار من اثنين، يا أشوف وأسكت.. يا أشوف وأشتغل.. وأنا معرفش أسكت وأنتوا متسكتوش ولازم أحل القضية.. حيث إن حجم المخلفات التي تصدت لها الحكومة في الـ 3 سنوات الماضية 2.8 مليون طن.. ودى مش قضية رئيس ولا حكومة بل دولة وناس".
استكمل الرئيس السيسي حديثه قائلًا: "يا جماعة فيه دولة فى العالم حجم مخلفاتها 2.8 مليون طن، لا لازم نخلى بالنا من نفسنا شوية.. وإحنا بنحاول نصلح".
"حجم المباني على الدائري غير صحية"
أكد الرئيس عبدالفتاح السيسي، أن حجم المباني الموجودة بجانب الطريق الدائرى هائل وضخم جدًا وكلها غير مخططة وغير صحية للمواطنين.
"مواجهة البناء المخالف"
قال الرئيس عبدالفتاح السيسي، إن الدولة تسعى لمواجهة البناء المخالف، متابعًا: "عاوزين نغيرها، وعندنا أكثر من مليون وحدة سكنية والوحدة السكنية اللى بتتعمل دى من أموال مصر.. محدش بيجيب حاجة.. دى من بلدنا.. وبالمناسبة نص مصر كده.. معرفشى بناخد بالنا من المشكلة ولا إيه؟!".
"غرق مدينة الصف"
وأضاف الرئيس السيسي: "ما حدث من غرق في مدينة الصف خلال الأمطار بالعام الماضى كانت أراضى زراعية"، متابعًا: "مش عملنا حاجة أو مشروعات إسكان أو غيرها على أرض زراعية.. وعملنا على أرض صحراوية فقط.. إوعى يكون الموضوع ده اهتمام الحكومة أو الرئيس فقط.. ينفع مش تحافظوا على الأرض الغالية "الزراعية" بالطريقة دى.. وتسيبوا صحراء مفتوحة؟!".
"لازم نشتغل على الأرض الزراعية"
وتابع الرئيس السيسى: "أكثر من 90% من أرض مصر صحراء.. ورايحين تبنوا على الأرض الزراعية اللى تشتغلوا عليها؟!.. ينفع أسيب الأرض الزراعية اللى هشتغل عليها وجاهزة بشكل كامل للزراعة.. ولازم نشتغل على الأرض الصحراوية".
"تطوير جسر السويس"
قال الرئيس السيسي، خلال فعاليات افتتاح مجموعة مشروعات إسكان بديل المناطق غير الآمنة:"بعض الأماكن دي على جسر السويس وكانت عبارة عن مزارع دواجن قديمة.. وكانت غير مستخدمة، وقولنا هنستفيد بالأراضى اللي تبع الحكومة أو المحافظة أو الوزارات المختلفة لعمل مشاريع للناس تتضمن إسكان ومناطق حرفية لتحقيق العمل بجانب السكن".
