بعد 16 عاما.. مجدي الهواري يكشف كيف غير جلد محمد رجب من أدوار الشر إلى الخير؟
روى المخرج مجدي الهواري، موقف كوميدي، ضمن أحداث فيلمه الشهير "الباشا تلميذ"، وذلك عبر حسابه على موقع التواصل الاجتماعي “فيس بوك”.
ونشر “الهواري”، صورة للفنان محمد رجب؛ قائلًا:"في يوم من الأيام وأنا بعمل فيلم الباشا تلميذ جالي محمد رجب وقالي نفسي تغير نظرة الجمهور لي في أدوار الشر اللي بعملها! مرة مغتصب ومرة اتهجم ع البطلة ودايما ضد البطل اللي بتحبه الناس".
وأضاف: "هل أنا هفضل طول حياتى كده مكروه شوف ياريس أنا هعمل الفيلم وهلعب الدور ده، لكن كان نفسي تشوفني في حاجة تانية غير دور الشرير ده، وكان نفسه يلعب دور حمزة اللي عمله رامز جلال".
وتابع: "بصراحة صعب عليّ قولتله لا أعمل دور طارق كابو في الفيلم ده وهنخليك تعمل حاجة صح يا رجب، وسكت وسمع الكلام الصراحة، لكن فضل طول الفيلم يسألني مش هتنفذ وعدك لي، أنا أقوله عيب يا حمادة أنا وعدتك إنك تعمل حاجة صح ومش فاهم حاجة، يضحك ويسكت ويقولي ماشي أنا واثق فيك".
وقال: "خلص الفيلم وهو يأس تماماً لدرجة انه مبقاش حتى يسألني، لحد ما جيت في آخر مشهد قولتلهم هاتوا محمد رجب تصوير مشهد الفينال وجه فعلاً وهو والله مش عارف جاي ليه! في مشهد هو مش فيه أصلاً! وفجأة قولتله محمد أنت هتنزل من هنا وتضرب لبسيوني تعظيم سلام وتقوله (حاولت أعمل حاجة صح) مكنش مصدق نفسه لأنه ده مكنش مكتوب في السيناريو ولا حد كان يعرف".
وأكمل: "كانت مفاجأة للجميع وللجمهور كمان إن يطلع طارق كابو هو اللي ساعد البطل مشهد فارق في حياة محمد رجب مع الناس إلى الآن وغير من بعدها جلده من شرير الفيلم إلى أدوار كلها طيبة وحنية وبقي بطل كمان إلى الآن أفلام ومسلسلات كمان من أصل المشهد ده! سبحان الله علشان نيته حلوة تفوت الأيام وأعمل نفس الراكشن وكأني بقول تاني بعد 16 سنة حاولت أعمل حاجة صح، وإن شاء الله تصبح المسرحية "ياما في الجراب يا حاوي" علامة فارقة في cv كل من شارك فيها بالطاقة الجميلة اللي عند كل أبطالها".
