هبة يسري تحكي موقف إنساني لـ دلال عبد العزيز.. وروّاد «فيسبوك»: قلبها حلو

قالت هبة يسري، مؤلفة ومخرجة مسلسل "سابع جار"، إنها ربطتها بالفنانة الراحلة دلال عبد العزيز، العديد من الذكريات التي توضح مدى سيطرة  الأمومة والطيبة في تعاملها مع الآخرين، وحب الخير للجميع، بجانب رؤيتها للعديد من المواقف الإنسانية.

وكشفت هبة يسري عن حكاية تروى لأول مرة عن الفنانة الراحلة دلال عبد العزيز، دلال عبد العزيز، قائلًة: "تستحق أن نحكي عنها مالم تحكيه ابدا و لو كنت رأيت منه القليل بالصدفة.. في إحدى المرات كنا بتصور في مصر الجديده لقيت حد بيكلمها كل شويه بيسأل عن المكان وجاي لقيتها بتقولي دي بنت بتتفرج عليه وعايزه تشوفني عشان مامتها اتوفت قريب ووحشاها ".

وتفاعل مع روايتها لهذا الموقف العديد من جمهور الفنانة الراحلة دلال عبد العزيز، والذين تأثروا به كثيرًا، داعين لها بالرحمة والمغفرة، وكتبت بكينام عفيفي من روّاد موقع "فيسبوك" قائلًة: "أكيد ربنا هايسعدها اكتر بكتير ما هى أسعدت الناس"، وعلّق علاء عادل من جمهور الفنانة الراحلة دلال عبد العزيز على موقع "فيسبوك" قائلًا: "ربنا يرحمها ويغفر لها يارب وعلى قد ما كانت قلبها حلو ربنا هديها كل حاجه حلوة".

وكتبت نجوى علاء تعليقًا على هذا الموقف عبر السوشيال ميديا قائلًة: "الف رحمه ونور عليها بصراحه انا كنت لما بشوف الست الجميله دي في التليفزيون معرفش ليه ديما كان بيجي لي احساس ان حضنها حلو وكله دفا مع اني اكبر منها في السن".

الموقف الإنساني للفنانة دلال عبد العزيز

وأضافت: "اتأثرت شويه بس كنا شغالين و مدام دلال طلبت شويه وقت لغايه ما البنت تيجي ... وصلت بنت بسيطه محجبه شايله بيبي ميكملش ٣شهور وجايلها من مكان بعيد جدا عشان بس تشوفها اول ما البنت شافت مدام دلال عيطت جدا وفضلت تحاول تمسك نفسها بس مقدرتش وانهارت في العياط ساعتها دلال خدتها في حضنها وفضلت تطبطب عليها والبنت تعتذر مكسوفه عشان ماتبقاش بتبشر بحاجه وحشه ودلال تقولها عيطي ولا يهمك وتدعيلها وقالتلها ما انا كمان ماما".

وتابعت: "مش انا برده ماما البنت قالتلها انا عايزه اوريكي بنتي عشان ماما ملحقتش تشوفها خدتها ولاعبتها واتصورنا مع بعض والبنت قالتلها أن ده احلي يوم في حياتها وشكرتها ومشيت ودلال كملت تصوير عادي بنفس روحها وكأنها بتعمل ده علي طول.. البنت طلبت مني اصورهم وانا فضلت اتفرج  واشوف اد ايه البنت البسيطه اللي جايه من مشوار طويل نزلت فرحانه ومبسوطه بحاجه بسيطه جدا دلال عبد العزيز عملتها من غير ما تفكر ولا تتردد ده موقف كان ليا حظ اني أحضره وعمرى ما شوفتها حكته لحد أو في برنامج او اتكلمت في الموقف لما خلص".

واختتمت قولها: "يمكن مكانتش عايزة تحكي علي وهبه ربنا لها في حب الناس وقدرتها علي أسعادهم لكن هي دلوقتي تستحق الناس تعرف بجد هي اد ايه انسان نادر و بالذات أنها احتفظت بإنسانيتها وبأمومتها في حرب الفن والظهور والنرجسيه اللي بتصيب الفنان مهما كان قوي وثابت لكن الأضواء ليها مفعول سحري بيغير الناس إلا دلال عبد العزيز".

يذكر أن مسلسل "سابع جار" حقق ردود فعل طيبة عقب عرضه سنة 2017 على شاشة قناة CBC، وهو من تأليف هبة يسري، إخراج هبة يسري، آيتن أمين ونادين خان، ومن بطولة دلال عبد العزيز، شيرين، أسامة عباس، محمود البزاوي، سارة عبد الرحمن، أحمد داش، محمود الليثي، محمد علاء، نيكولا معوض، هاني عادل، هيدي كرم، عمرو سلامة وفدوى عابد.