«ذاكر ورزقك على الله».. وزير التعليم ينشر رسالة معلم لطلاب الثانوية العامة

نشر الدكتور طارق شوقى، وزير التربية والتعليم والتعليم الفني، رسالة المعلم محمد جاد (معلم أول حاسب آلي بمدرسة دشنا الثانوية ومسؤول IT  وإحصاء ومدير مكتبة يحيي دشنا)، لطلاب الثانوية العامة، عبر صفحته الشخصية بموقع التواصل الاجتماعي فيسبوك.

وأبدى الوزير إعجابه الشديد بنصائح المعلم، قائلآ: "سعدت لدقة وعمق نصائح هذا المعلم الفاضل وقررت أن أشارككم إياها".

وقال المعلم في نصائحه للطلاب والتي نقلها وزير التعليم: “أبنائي وطلاب وطالبات الثانوية العامة في كلام كده من القلب عايز أقولكم ومعلش ممكن يكون كتير شوية بس ما هو طالع من القلب وملهوش علاقة بأني اتفق أو لا أتفق مع المنظومة الجديدة للتعليم (نظام التابلت)، الغرض الأساسي للمنظومة الجديدة هو قياس نواتج التعلم، يعني بالبلدي افهم المعلومة صح وإيه أهميتها وازاي أطبقها ومنسهاش مش زي الفترة اللي فاتت، اللي يحفظ كويس يجيب مجموع واللي مش عارف يحفظ كويس بينسي حاجات وطبعا المجموع بيقل وفي الأخر ادخل كلية مش عايزها وأهو حاجة والسلام، ما هو الواحد تعب والسبب إن  كلنا عايزين ندخل علمي علشان إزاي أبقى أدبي فلان دخل علمي، هو أحسن مني في إيه، ومين قال إن الأدبي وحش، كل واحد فينا ليه قدرات وذكاء يختلف من فرد للثاني، ودي أول غلطة بتغلطها، شوف إنت نفسك في إيه ومتخليش حد يرسملك طريقك ارسمه بنفسك واجتهد وبإذن الله ها توصل لحلمك، بس انت اعرف نفسك صح وذاتك صح وحط هدفك قدام عنيك”.

وتابع: "بالنسبة للخوف من نظام الامتحان وشكل الأسئلة وهل هو تابلت ولا ورقي وناس عايزة ورقي وناس عايزة تابلت وناس مبقتش فارقة معاها أهو اتعقد وخلاص!".  

وشدد: «أحب أقولك مش مهم ها تمتحن إزاي أو هاتجاوب إزاي، الأهم أنت استعديت لشكل الأسئلة الجديدة كويس ودي الحاجة الوحيدة اللي حاليا معروفة، ولكن مش عايزين تشوفها أو حتى تقربوا منها، أنتا عايز السوال تكون ليه إجابه محددة مش مهم إزاي أفكر، لكن خلاص قضي الأمر، ياريت بقي تحاولوا تشوفوا نمط الأسئلة دي وتتدربوا عليها لازم تجتهدوا».

 أوضح المعلم: «هناك نقطة أخرى، في طلاب كتير فرحت إن الامتحان أوبن بوك، طيب يعني إنت عايز ايه من الكتاب لما هاتدخل بيه، القليل للأسف فاهم إن معنى الكتاب معاك يعني إنك عارف كويس كل معلومة ممكن ترجعلها عارف مكانها فين وطبعا أكيد السؤال مش هيكون مباشر ولكن الواقع اللي شايفه وعايشين فيه إن الطلاب عايزة الكتاب علشان تكتب ملاحظات فيه زي ما الوزير ما قال، وهنا أسالك الملاحظات دي هتكون فعلا معلومات بحثت عنها من المصادر المختلفة وحابب تكتبها أم أسئلة من ملخصات تتوقع إنها تيجي في الامتحان كما يحدث أو إنك هتصور ملزمة ليلة الامتحان أو أجزاء من الملخصات وتحشرها وسط الورق المصور بتاع الكتاب ده كله تشتيت ليك وهيضيع وقت الامتحان».

واستطرد: «أرجو منكم أن تفوقوا وتجتهدوا وبإذن الله خير، ولكل مجتهد نصيب وكل واحد فينا مقسوم له هيدخل إيه، كل اللي عليك اجتهد وذاكر والكلية والمستقبل بيد الله وحده».

واختتم رسالته قائلا: «بإذن الله فترة وهتعدي ويارب الدفعات اللي بعديكوا يكون حظها أحسن ويتم حل تلك المشاكل والمعوقات ولازم العلاج ياخد وقت».

من جهته علق وزير التربية والتعليم والتعليم الفني الدكتور طارق شوقي، على كل ما كتبه المعلم المذكور عبر فيس بوك قائلا: "إنها حقا نصائح سديدة من معلم مصري أفخر بالعمل معه في منظومة التعليم المصري، بالتوفيق والنجاح الباهر لكل الطلاب".