«محنة وهتعدي».. فنانون يدعمون شريف دسوقي بعد بتر قدمه
دعم عدد من الفنانين عبر صفحاتهم الشخصية علي مواقع التواصل الاجتماعي الفنان شريف دسوقي بعد أن تعرض لبتر قدمه بسبب مرض السكري.
وقال الفنان حسني شتا: "الله يشفيك يارب يا شريف ويقومك بألف سلامة ويعوضك خير وتعملنا مسلسلات وأفلام كتير وتمتعنا بفنك ياحبيب الجماهير؛ ادعوله يعدي المحنة ديه على خير شريف الدسوقي".
وقال المؤلف والممثل عمرو محمود ياسين: "الفنان شريف دسوقي ألف سلامة عليك أكيد ده اختبار كبير من ربنا.. و قدر الله وما شاء فعل.. خلي بالك على صحتك وتماسك.. وبإذن الله هنشتغل مع بعض قريب لإني من معجبينك.. وأول عمل يكون فيه دور مناسب هسعد بوجودك فيه.. ولتستمر الحياة.. خليك قوي".
بينما قال الفنان حمزة العيلي عبر صفحته الشخصية على موقع التواصل الاجتماعي "فيسبوك": “يا حبيبي يا شريف اللهم لا اعتراض ربنا يتم شفاك على خير ومتقلقش يا فنان ياعظيم حبايبك كتير محدش هيسيبك وكلنا جمبك ربنا يصبرك ويقويك يا حبيبي”.
وأضاف: دعواتكم للصديق الفنان المحترم شريف الدسوقي فقد خضع لجراحة بتر قدمه من أسفل الركبة ابتلاء شديد ربنا يقويك عليه وبإذن الله سيعوضك الله رزقاً ومالاً وأعمالاً أضعاف ماكنت عليه لله الأمر لطفك يارب".
وقال الفنان محمد يسري: "بعيدا عن أد إيه شريف دسوقي ممثل قوي جدا وحقيقي.. بس أنا كمان بحبه أوي على المستوى الإنساني، وعدى بصعاب كتيرة ودائما كان بيتغلب عليها لأنه مؤمن أنه هيقدر يعديها وده اللي بيعمله دائما".
وأضاف: "شريف للأسف اتعرض لمشكلة صحية والدكاترة اضطروا لبتر رجله.. أنا متأكد مليون في المية إنك إن شاء الله هتعدي المحنة دي كعادتك و كمان إنت دلوقتي مش لوحدك، مصر كلها بجد بتحبك وبيدعولك.. ربنا يقويك ويقومك لينا بألف سلامة يا شريف ويعديك من المحنة دي يا رب يا حبيبي".
أما الفنان مدحت تيخة فقال: "ربنا يشفيك ويعافيك يا حبيبي ده ابتلاء كبير من ربنا وإن شاء الله ربنا يجعله في ميزان حسناتك أرجو الدعاء لشريف دسوقي حبيبي فهو الآن يجري عملية بتر لقدمه ربنا يخفف عنه يارب".
بينما قال الفنان مصطفى درويش : "للأسف خبر بتر رجل شريف دسوقي حقيقي ادعوله يا جماعة والله الواحد ما عارف يعمل إيه بس الله يقويك يا شريف ويشيل عنك كل اللي أنت فيه أنت ماتستاهلش كل ده استغفر الله العظيم يارب.. ربي إني لا أسالك رد القضاء ولكني أسالك اللطف فيه.. ادعوله ربنا يقويه محنة صعبة أوي".
وشارك شريف دسوقي في السباق الرمضاني كضيف شرف في مسلسل «نجيب زاهي زركش» أمام النجم الكبير يحيى الفخراني، كما انتهى مؤخراً من تصوير مشاهده في فيلم «الإنس والنمس» بطولة النجم محمد هنيدي، وتدور أحداثه في إطار كوميدي، ويشارك فيه نخبة كبيرة من الفنانين منهم منة شلبي، صابرين، عمرو عبدالجليل، بيومي فؤاد، عارفة عبدالرسول، محمود حافظ، ومن إخراج شريف عرفة، ومن المقرر طرحه بدور العرض السينمائية الفترة المقبلة.
