القصة الكاملة لخناقة ياسمين عبدالعزيز وشقيقها
نشر الفنان أحمد العوضى، على حسابه الشخصي على موقع التواصل الاجتماعي "فيسبوك"، مقطع فيديو يجمعه بالنجمة ياسمين عبدالعزيز، وتضمن المقطع، مشاهد من مسلسل "لآخر نفس"، ليعبر عن حبه لها، موجهًا رسالة بأغنية "اطمني" للنجم تامر حسنى، وذلك بعد إعلانه ارتباطهما رسميًا، فور هجوم شقيقها عليها.
بداية الأزمة:
منشور كتبه الفنان وائل عبدالعزيز، أخو ياسمين عبدالعزيز، عبر صفحته على "فيسبوك"، يهاجمها من خلاله، مطالبًا بتوضيح علاقتها بالفنان أحمد العوضي، قائلًا: "بصي يا ياسمين يا عبد العزيز يا أختي، أنا معاكي وفي ضهرك من وأنتِ صغيرة شيلت مشاكل كتيًر بسببك ووقفت جنبك بكل ما أملك من قوة أدافع عنك في كل موقف صعب مر عليكي، ونسيت حياتى ونفسى علشان تبقى نجمة في مجالك".
وأضاف: "من إمتى وإحنا بنعمل أعياد ميلاد وتنزل على السوشيال ميديا، من إمتى الناس بتجيب في سيرتنا!؟ ونقعد نتعاكس على السوشيال ميديا، ومع ذلك حياتك وأنتِ حرة فيها، أنا هتكلم على الشق إللى يخصنى، إحنا دلوقتي عايزين نفهم العلاقة دى إيه ورايحة على فين؟، أما بالنسبة للأخ اللى ماشي وراكي في كل حتة وشايفك البيضة الدهب إللي هتفقسله كل يوم، أحب أقولك يا راجل لما تيجي تدخل بيت تدخله من بابه وتقعد مع رجالة البيت!!.. دي الأصول وده الاحترام".
وتابع: "ياسمين سألتني بعد الطلاق إنها ممكن تحب وتتجوز وأنا أول واحد قولتلها طبعًا حبيبتى ومن حقك وهبقى أول حد يفرحلك.. بس مش إنت لأني أعرفك من سنين وعارف نواياك والأيام هتثبت صحة كلامى، نصيحة مني ليك لما تدخل على ست متختارش وقت ضعفها وخروجها من طلاق ومشاكل، كنت بقيت صديق ينصح ويحافظ ويخاف لحد ما تبقى قوية تانى.. مش يتصور صور زى دى".
رد ياسمين عبدالعزيز:
وردت "عبد العزيز" على الهجوم الذي تعرضت له على يد أخيها، بالإعلان رسميًا عن حبها للعوضى، كما نشرت صورة برفقته معلقة عليها: "بحبك يا أحمد"، ليرد عليها هو الآخر بذات العبارة.
هجوم العوضى على وائل عبدالعزيز:
رد الفنان أحمد العوضي، على شقيق ياسمين عبدالعزيز بعد أن هاجمهما في منشوره السابق، قائلا: "أنهي بيت اللي أدخله من بابه.. إن كانت هي اللي بتصرف عليك وعلى ابنك اللي مخبيه وراميه وهي بتدفعله مصاريف مدرسته.. باب إيه يا بنى أدخله هو أنا شفت راجل واقف جنبها.. دي واحدة إنت مبتعملش حاجة غير إنك بتستنزفها هي ومامتها".
وتابع البوست: "باب إيه يا بني اللي هدخله من بابه وأكلم واحد بيتكلم على عرضه ولحمه قدام الناس.. يا بني أنا من عين شمس منطقة شعبية اتربيت على أن الإخت والأم والست الكلام عليهم من الكبائر.. عربية إيه يا بني أنا أجري الحمد لله يعيشني كويس ويجيبلى عربية حلوة وبیت كويس.. بمجهودى وشغلى مش على عرق واحدة ست.. باب إيه يا حبيبى اللى ادخله وإنت أصلا عايش باسمها.. أنا شقيت على حالى بعرقى.. لكن إنت فشلت في كل شىء فشلت كممثل وفشلت كأب وفشلت كأخ وفشلت كبنى آدم».
ثم عاد العوضي وحذف المنشور.
انتهاء الخلاف:
وجه أخو ياسمين عبد العزيز، رسالة جديدة لها، خلال فيديو على فيسبوك، قائلًا: "ربنا يوفقك يا ياسمين وينجحك في حياتك.. أنا قسمًا بالله وممكن اتكلمت بشكل يضايق أنا آسف.. أنا كل اللي عاوزه أعرف طبيعة العلاقة دى إيه لأن الكلام كان كتير جدًا.. من النهارده اعتبريني برّه حياتك وإنتي حرة فى حياتك ومستقبلك.. ومش قادر أعيش بالشكل ده والمنظر ده.. ربنا يوفقك".
