محمد المعتصم يكتب: يوميات رمضان (15)
- إعلان 500 500 صالح ناس كتير من الي غابت عن الموسم الرمضاني وخلاهم يطلعوا في حاجة حلوة.. يسرا وليلي علوي بيعرفوا يخطفوا الكادر واسر ياسين وهنا وحلا شيحة وانجي المقدم مبهجين ولاعيبة الاهلي والزمالك شكلهم يفرح وهم مع بعض بعيدا عن تعصب المباريات.. وحماقي متألق.. المخرج مازن المتجول يستحق التقدير
- إعلان 500 500.. لما يبقى جايلك ضيوف مهمين وتطلع لهم الطقم اللي في النيش
- إعلان 500 500 مبهج ودرس جديد لصناع اعلان أهل مصر انك علشان تعلن عن تبرعات لمستشفي أو مرض مش لازم تضايق المشاهد
- إعلان 500 500 شهد أول ظهور لعمرو يوسف هذا العام لكن غابت زوجته كنده علوش
- إعلان 500 500 هو أول مشاركة في عمل لـ مي عمر من اخراج شخص اخر غير زوجها المخرج المتميز محمد سامي
- أعلن 500 500 عامل زي أهداف الاهلي بعد الدقيقة 90.. حلو وبيخليك تنسي تفاصيل المباراة
- أدعو لبطل إعلان 500 500 الطفل محمد أحمد امام اللي بيحارب المرض من 4 سنين ربنا يشفيه ويعافية
- على ذكر الدعاء في رمضان الاعلامية بسنت بكر المذيعة بالراديو 9090 ربنا ابتلاها بورم وهتخوض التجربة القاسية وتبدأ العلاج ادعولها ربنا يشفيها هي والزميل أحمد حافظ الصحفي بالاهرام وكل مرضانا
- ورش التمثيل في مصر أكتر من الهم ع القلب، في الدقي والمهندسين ومصر الجديدة والهرم واكتوبر.. مشاريع كتير لا تتوقف عن صناعة ممثل.. أعتقد أن الورشة التى ستتعاقد مع حنان مطاوع بعد الاداء المبهر في لمس اكتاف.. أكيد هتخلي بقية الورش يقفلوا ويشوفوا مطرح ع القد في الحرفيين
- الاستفادة الوحيدة من برنامج شيخ الحارة ان الجمهور عرف أن الطحال أحد اسباب الطلاق.
- سواء أعجبتك دراما رمضان أم لم تعجبك فالمؤكد أن العمل الذي امتد ل18 ساعة، في بعض المسلسلات، وشهد ضغط في العمل وفي تسليم الحلقات ورغم ذلك لم نشاهد أي كوارث في الراكور، فلم نرى ممثل يرتدي بنطلون في مشهد وشورت في مشهد اخر، ولم نشاهد أحدا يضع ساعة في ايده اليمين وتنتقل الي الايد الشمال.. هي تفاصيل صغيرة لكن كانت واحده من أهم مشاكل الدراما العامين الماضيين وكانت السوشيال ميديا تلتقطها وهات يا ضحك.. شكرا لمساعدي الاخراج والانتاج الذين اهتموا بالتفاصيل الصغيرة وشكرا للمتابعة الدقيقة
- يا الهي كيف ترعرع في وادينا الطيب كل هؤلاء المواطنون الشرفاء.. مواطن شريف قدم شكوى للبرلمان بيقول فيها: " الحق يا باشا فيه مسلسل البطل فيه ضرب ممثل بيقوم بدور عضو مجلس شعب ودي اهانه لا تغتفر يا باشا لأني كمواطن نفسيتي وجعتني "
- " أُبلغت بالغزو العراقي للكويت فجر 2 أغسطس.. وكانت صدمة.. وكان عندي الشيخ زايد وعاد إلى أبوظبي بطائرة الرئاسة المصرية.. تخوفًا من ضرب صدام لطائرته"
( حسني مبارك لفجر السعيد - جريدة الرأي الكويتية )
- على جانب اخر من الحياة بعيدا عن السوشيال ميديا هناك اسر تتابع سي بي سي سفرة وبرامج الطبخ والشيف علاء الشربيني
- في مسلسل الزوجة ال18 مذيعة راديو طلعت لايف على فيس بوك علشان نفسيتها متأثرة من اللي عمله حسن الرداد وقررت تنتحر.. قالت: ده سم ودي ميه هنحط السم ع المية ونقلبهم كويس ونشربهم كده وهوب فضلت تصوت وتقول الحقوني حد يوديني مستشفي
المشهد عبيط وتصويره أهبل لدرجة اني ضحكت أول ما حطت السم ولقيته بيفور في المية ( تقريبا حطت فوار فواكه )
- السؤال اللي طلعت بيه من حلقة الزوجة ال١٨ ومش لاقي له اجابة: هل الطلاق من حسن الرداد يخلي الست تنتحر.. ده انتي تروحي لأبلتك بسمة وهبة تطلع لك فيه القطط الفطسانة وتاخدي حقك تالت ومتلت واخر الحلقة تاخدي الشيك وطبق بيض مدحرج وتهيصي.. قال تنتحر علشان حسن الرداد
- افضل عقاب لـ" ياسمين عبد العزيز" اننا نفرجها على "ياسمين صبري" وأفضل عقاب لـ"ياسمين صبري" اننا نفرجها على "علي ربيع" وأفضل عقاب لـ"علي ربيع" اننا نفرجه على" مصطفي خاطر" وأفضل عقاب لـ"مصطفي خاطر" اننا نفرجه على "ايمي سمير غانم " وافضل عقاب لـ "ايمي سمير غانم" اننا نفرجها على "مي عز الدين" وأفضل عقاب ليهم كلهم اننا نجمعهم ونفرجهم على "هاني رمزي "
دعاء اليوم: اللهم اكفني بحلالك عن حرامك واغنني بفضلك عمن سواك
