لعبة كل يوم

حطّى المناديل..
والكام هدمه اللى حيلتى
وصورتك وإنت شابّه
وبتضحكى
وريحة الحب هتطلع من البرواز..
حلـم وأمل..
قادرين ع الحياة مع بعض
وبيلعبوا كل يوم لعبة..
مين فينا يقدر يرسم على وش التانى فرحة
واللى يكسب يختار ف عنيك يسكن..
ف مساحة صغيرة
يدوب على قد قعدة حلوة
وكبايتين شاى
وكام ديوان شعر عامية
وإسطوانتين لفيروز وعبدالوهاب
«وأنا عايش بيك..
زى ما أكون عايش من غيرك»
طبعًا دى جملة..
مالهاش أى محل من الإعراب ف حياتى
زى عصفور كان على شجرة وطار
زى هدف ف مرمى الفريق التانى
وإحنا ماكسبناش البطولة
م أنت عارفة بحبك قد إيه
وقلبى ف غيابك زى بيت مهجور..
ف شارع ضلمة..
ف مدينة كل سكانها عرايس ورق
يعنى ماتصدقيش أى كلام أنا قلته
وتعالى نحلم ببكرة
وأنت لسه بتضحكى
ومكسرة البرواز