الإثنين 06 ديسمبر 2021
رئيس مجلسى الإدارة والتحرير
د. محمد الباز
رئيس التحرير
وائل لطفى
رئيس مجلسى الإدارة والتحرير
د. محمد الباز
رئيس التحرير
وائل لطفى

سيدى البغدادى

ناديين في الدوري الممتاز، وليكن مثلا مثلا يعني المقاصة وسموحة، المفروض يواجهوا بعض كام ماتش في الموسم الواحد؟
الإجابة: طبعا ماتشين، الدور الأول والدوري التاني.
تمام، لكننا في الإيجيبشيان ليج الخالدة شفنا كتير كتير، ناديين بـ يقابلوا بعض تلات ماتشات في موسم واحد: الدور الأول والدور التاني ثم ماتش فاصل. الماتش الفاصل دا على حاجات كتير كتير كتير زي اللقب وتجنب الهبوط، وغيره.
إنما هل فيه 4 مواجهات؟ يعني فريقين قابلوا بعض 4 ماتشات في موسم واحد؟ يووووه كتير، عشان الماتشات الفاصلة دي ممكن يبقوا ماتشين رايح جي، زي مثلا المقاولين والسكة الحديد موسم 1992، بعد ما خلص الدوري، لعبوا ماتشين رايح جي، عشان نعرف مين يهبط، وكذا حالة كدا.
طيب نعلي شوية الرقم، هل ممكن خمس ماتشات في موسم واحد؟ يعني ناديين يقابلوا بعض في نفس ذات نفس الموسم خمس ماتشات؟
والله حصلت، والله تاني ولا ليك علي حلفان، حصلت. 
كان موسم 1956-1957، وكان فيه السيد عبد اللطيف البغدادي، أظنه معروف، كان وزير حربية في فترة، ما بين 1953-1954، بعدين تولى مناصب كتير، منها نائب رئيس الجمهورية نفسه، بس في الفترة اللي إحنا بـ نتكلم  فيها كان وزير لـ إعادة تعمير بورسعيد، قبل ما يبقى أول رئيس مجلس أمة منتخب.
ماله البغدادي ومال الكورة، وخمس ماتشات؟ 
ما هو من الدقهلية، وما كانش عايز المنصورة تهبط، وبـ يضغط بـ كل الوسائل عشان تفضل في الدوري الممتاز.
الدور الأول في ذلك الموسم الخمسيناتي، من 13 ماتش كان رصيد المنصورة 4 بنط فقط لا غير. فـ في الدور التاني بقى كل الدعم كل الدعم. والأرض لو تتزلزل منصورة مش هـ ننزل، والجرايد تكتب مقالات: 
يا إخوانا حرام المنصورة تهبط، وبـ الأرقام: عائدات التذاكر في ماتشاتهم الأعلى خارج القاهرة، لا إسكندرية ولا الغربية ولا أي مكان تاني بـ جيب فلوس زي المنصورة. والمنصورة بـ تلعب حلو. والمنصورة أجدع ناس. والمنصورة المنصورة المنصورة.
فـ بعد كل هذا الدعم طلعت برضه الأخير في جدول الدوري العام، اللي كان لـ أول مرة بـ يتلعب 14 نادي، بس بـ فارق الأهداف عن اتحاد السويس اللي سابقها على طول في الترتيب.
فـ قال لك: لأ، مفيش الكلام دا، فارق أهداف إيه وبتاع إيه! العب ماتشين فاصلين، مع إنه في سنوات قبلها، درع الدوري نفسه اتحسم بـ فارق الأهداف، ثم إنه المنصورة واتحاد السويس أساسا لاعبين ماتشين في الدوري: دور أول ودور تاني، يبقى كدا 4 ماتشات.
ما علينا!
لعبوا ماتشين فاصلين، المنصورة كسبت ذهابا 2/1، اتحاد السويس كسب إيابا 2/صفر، كدا بقى حق ربنا المنصورة تهبط خلاص، نتيجة الماتشين 3/2 لـ اتحاد السويس، قال لك لأ.
لأ ليه؟ 
دا فوز قصاد فوز العب ماتش فاصل كمان، فـ دا كان خامس ماتش بينهم في هذا الموسم، الماتش خلص 4/1 لـ اتحاد السويس، فـ الحمد لله إنهم ما قالوش نلعب تاني.
بس طبعا طبعا لغوا الهبوط خالص، والمنصورة فضلت.