حمو بيكا مهاجما عمر كمال: «لو اتعميت شعاعي ونوري يخليك تشوفني»

هاجم مؤدي المهرجانات حمو بيكا من جديد المطرب عمر كمال في فيديو بث مباشر مدته 4 دقائق، بعدما رفض الأخير تسجيل مهرجان جديد يجمعهما ويحمل اسم "فستان الفرح".

وقال بيكا في الفيديو الذي نشره عبر صفحته الرسمية على موقع التواصل الاجتماعي "فيسبوك": "أنا مكنتش أعرف عمر كمال من سنتين، دخل بعتلي رسالة على الواتس (حبيبي يا نجم أنا كمال بتاع أغنية الغربة، أنا محتاج أعمل معاك أغنية) وعشان أنا أبيض وقلبي أبيض قولتله دا مكانك وعملت له أول أغنية (مساء النقص) والأغنية نجحت واتشهر على إيدي، وكلمني تاني وعملنا (شمس المجرة)".

وأضاف: "كنت فاكره غلبان بس مطلعش كده، وعملنا التراك بتاع (إنتي معلمة) وعملت قصاده تراك قالي بتاعي الأول قولتله أنا وأنت واحد، واحنا قاعدين مدير أعمالي اتصل بيا قالي في تراك اسمه مهرجان (فستان الفرح) وهو وافق، وخدت العربون، وبتصل بيه تليفونه مقفول".

وتابع: "الناس ركبت على كتفي، أنا بس بوصل رسالة لعمر أنت إنسان أناني، الدنيا مش دايمة.. المحبة اللي دائمة، لو أنت اتعميت مشوفتنيش شعاعي ونوري يخليك تشوفني".