القاهرة : الخميس 21 سبتمبر 2017
محمد الباز رئيس مجلسى الإدارة و التحرير
محمد العسيري رئيس التحرير التنفيذي
ads
ads
منوعات
الأربعاء 13/سبتمبر/2017 - 09:10 م

أحمد يونس.. المرعب x حياة ملك الرعب

أحمد يونس
أحمد يونس
مصطفى شهيب
dostor.org/1547318

لا يسبق اسمه إعلامى كبقية زملائه، يمتلك جماهيرية ضخمة تليق بنجم سينمائى، طموحه لم يتوقف كونه أصبح من أهم مذيعى الراديو فى العقد الأخير، واقتحم عالم الأدب بروايته الأولى «نادر فودة» أول العام، والآن يصدر الجزء الثانى منها «كساب». المعلم أحمد يونس يفتح قلبه فى السطور المقبلة.

■ مبروك الرواية الجديدة، بس ليه جزء تانى مش رواية جديدة؟
- هى تعتبر رواية جديدة برضه، لأن الجزء الأول من الرواية انتهى نهاية مفتوحة ومشوقة، فأنا استغليت ده كخيط لقصة جديدة خالص وفكرت طبعًا اللى بيقرا باللى حصل فى أول جزء.
■ ليه فكرت تكتب رواية جديدة أصلًا؟
- لقيت نفسى فى الكتابة، ولقيت تشجيع كبير أوى أوى مكنتش متخيله من جمهورى فى أول رواية، المبيعات كمان كان ليها كلمة، وحفلات التوقيع اللى عملتها فى معرض الكتاب وغيرها، أنا نفسى مكنتش بفكر إنى أكتب جزء تانى بس ده كان طلب الناس.
■ كنت عامل قلق فى معرض الكتاب اللى فات وحفلة توقيعك اتصنفت كأكبر حفل توقيع حصل فى معرض الكتاب من ساعة ماتعمل وطلعوك منه على المستشفى.. متوقع نفس النجاح؟
ــ الأولى ليها زهوتها، الناس حابة برضه تشوف أحمد يونس المذيع لما يكتب هيكون عامل إزاى، فأنا ماقدرش أحكم على نجاحى من أول تجربة، يمكن التجربة الجديدة دى هى اللى تبين نجاحى ولا لأ.. أنا مش نازل فى سيزون أهه، أنا نازل فى أيام عادية وهادية فاللى حب فعلًا أحمد يونس الكاتب هيبان.
■ ليه غيرت دار النشر؟
- مش هتكلم عن دار النشر اللى نشرت معاها قبل كده بحاجة وحشة، بس هقول إنها محققتش طموحاتى.
■ ليه رواية رعب تانى طيب، مفكرتش تكتب رومانسى مثلًا؟
- بذمتك ده منظر واحد يكتب رومانسى، لو كتبت قصة حب بين اتنين هتخيل البنت هتعضه فى رقبته تموته وعفريتها يفضل يطارد البطل بعد كده.
■ مين من كتاب الرعب بتحبهم؟
- حسن الجندى ومحمد عصمت أشطر اتنين بصراحة.
■ ومين الكاتب اللى ممكن يقعدك فى البيت؟
- أحمد خالد توفيق لو رجع يكتب رعب تانى هلم نفسى ومش هستجرى أكتب لأن أى حد هيكتب بعده هيبقى لعب عيال.
■ إيه رأيك فى التجارب الإذاعية دلوقتى اللى بتقدم محتوى الرعب؟
- مفيهاش جديد، ويفضل التاريخ فاكرلى إنى أول واحد دخلت الرعب المسموع فى الراديو فى الآخر.
■ طب إيه اللى بيرعب ملك الرعب؟
- أنا بخاف أوى من المرتفعات، بترعب بجد، دايمًا عندى إحساس إن فيه حد هيزقنى أو هيجيلى فقدان وعى وأقع.. لك أن تتخيل بقى إنى ساكن فى الدور الـ١٣ والبلكونة دى ماعتبهاش.
■ حاولت تعالجها؟
- بروح أتشقلب فى دريم بارك فى لعبة الصاروخ وبرجع أخاف تانى.
■ أخبارك إيه مع الصراصير؟
- مبخافش منها بس بقرف.
■ الفيران؟
- حبايبى.. بس الفيران الرمادى المعفنة دى مش الهامستر السيس.
■ عندك فوبيات غريبة؟
- آه بخاف من شكل المهرج.. بيبقى حاطط ماكياج مخيف بالنسبة لى ومببقاش شايفه ولا شايف ملامحه ولا عارف هو بيضحك ولا بيعيط، كمان بيخوفنى القلم وهو بيشطب وصوت سن القلم على الورق وهو فاضى.
■ بتخاف من لحظات الفراق؟
- أوى، يمكن عشان فارقت أكتر اتنين بحبهم، أبويا وصديقى إيهاب ماضى، من ساعتها اتكسرت حتة جوايا وخوف من أن أى حد ممكن الموت يخطفه وأنا جنبه ومقدرش أعمله حاجة.
■ خطبت بتاع ٧ مرات.. ما بتخفش من لحظات الوداع؟
- لأ ده كان زمان بقى قبل متجوز.. دلوقتى بخاف على معز ابنى، بخاف عليه الخوف المرضى ده اللى هو ممكن مخليهوش يسلم على الناس عشان مايجلوش أمراض.
■ إيه أكتر لحظات خفت فيها فى حياتك؟
- لحظات كتير، يعنى مثلًا يوم ما مشيت من «نجوم إف إم» خفت لأنى مكنتش عارف إيه الخطوة الجاية وخفت إن ١٣ سنة شغل فى الراديو يضيعه كده فى الهوا، خفت فى حفلة توقيع معرض الكتاب اللى فات إن محدش ييجى بس كان على عكس التوقع الحمد لله.
■ إيه أكتر كابوس جالك وأنت نايم متنسهوش؟
- إن أمى بعد الشر عليها بتفارقنى وكان تفسير الناس الفاهمة للحلم إنى قلقان عليها بزيادة.
■ هل فيه كابوس بيجيلك على طول؟
- آه كابوس رخم، إنى طالع هوا على الراديو وفجأة صوتى بيختفى ومبعرفش أتكلم وكل مرة بقوم منه مفزوع.
■ أنت شخصية متفائلة ولا متشائمة؟
- متشائمة لأقصى درجة وكئيب ونكدى وكشرى ومبوز وسخيف وأنا معترف.
■ تفتكر فيه عفاريت فعلًا؟
- آه وطلعتلى عفريتة قبل كده ومش عايز أحكى التفاصيل عشان الناس هتفتكرنى بشعوذ.
■ اتعملك عمل قبل كده؟
- أنا معرفش إيه أعراض اللى معموله عمل، بس الأذى موجود.
■ وليه بيتقال عليك مغرور؟
ــ عشان عارف اللى أنا وصلتله ومقدر حجمه وبرفض أطلع فى برنامج مستضيف مذيعين الراديو لوكشة كده على بعض وبحب أطلع لوحدى، وعشان شخصية مريضة فى شغلى وببقى لا أطاق مع أى حد ممكن يوقعنى أو يهد نجاحى، بس الناس كلها بتبص على الجزء ده محدش بيشوف أتوبيس الخير اللى بعمله مثلًا.
■ علق على كل اسم مذيع بكلمة:
■ سالى عبدالسلام
- حضورها طاغى.. قدرت تكسب بيه كل طبقات الناس.
■ خالد عليش
ــ بيقدم حاجة محدش يعرف يعملها وليه مدرسته.
■ إيهاب صالح
ــ صديقى وملك الميكسات.
■ أكرم حسنى
ــ أيقونة نجاح بكل المقاييس.
■ أسامة منير
ــ ملك الرومانسية ومحدش يجرؤ يقرب من حتته.
■ أحمد موسى
ــ أكن له الاحترام مع إنى شخصيًا معرفوش ومهنيًا مبشوفوش.

ads