آسر ياسين آخر الداعمين للنساء.. رجال الفن ينتفضون ضد التحرش
انتفضت جميع وسائل التواصل الاجتماعي عقب قضية أحمد بسام زكي المتهم في قضايا اغتصاب، وتصريحات الداعية الإسلامي عبدالله رشدي المثيرة للجدل ضد الفتيات، وتحريضه على الفتيات بسبب ملابسهن.
وتحولت المنصات الإلكترونية إلى ساحة نقاش مفتوح للحديث، بعد تدوين فتيات كثيرات مواقف التحرش التي تعرضن لها سواء في الشارع أو في محيط عملهن، ولكن الأمر لم يقتصر على النساء، حيث انتفض المشاهير الرجال بشكل آخر، فقد دون بعضهم أراءه وأعطوا حلولا لمواجهة تلك الظاهرة المشينة.
آسر ياسين:ناشد الفنان آسر ياسين عبر حسابه الرسمي على "انستجرام" أصدقائه من الفنانين بتحمل مسؤوليتهم لمواجهة ظاهرة التحرش الجنسي.
وقال: "موضوع التحرش ده قديم مش جديد، مش هقعد أقول كلام له علاقة بأن الأهالي تاخد بالها من بناتها، وإن البنات تشتكي لو حد قالها حاجة لأن ده بديهي، فيه مسئولية فنية على أصدقائي من الفنانين مخرجين ومنتجين وممثلين، يعني من فترة مش كبيرة كانت فيه أعمال بتتعامل مع موضوع التحرش إنه عادي، وعادي إن البطل يلمس الست وإن الست الأجنبية مستباحة لأنها أجنبية، وفي الآخر البطل بيتحب وينتصر، ده طبعا بيبقى المثال بتاع الشباب، طب مالبطل بيتحب ليه ماعملش كدة أنا كمان، وعشان كده بناشد كل المخرجين والمنتجين والممثلين والكتاب، إنهم لازم يراعوا الموضوع ده لأن إحنا واجهة الشباب".
- مصطفي درويش:قرر الفنان مصطفى درويش دعم ومساندة ضحايا التحرش، عن طريق محامين دون مقابل، وقال في مقطع فيديو نشره عبر حسابه بـ"إنستجرام": "أنا بناشد البنات اللي حصلها الواقعة دي تتقدم ببلاغ، ولو عندهم مشاكل مادية أنا عندي طاقم محامين وأنا متبرع ليهم من غير ولا مليم، متخافوش إحنا في ضهركو، ولو أي واحد اتحرش بيكم، احنا معاكوا".
- محمد منير:كتب الفنان الكبير محمد منير عبر حسابه على تويتر معلقا على انتشار ظاهرة التحرش: "لم تعرف ثقافة مصر ولا رجالها لفظ التحرش الجنسى، وعلى طول تاريخنا كان الرجل المصرى هو مضرب الأمثال فى الدفاع عن كرامة المرأة والاحتفاء بها، أعتذر بالنيابة عن كل رجال مصر الشرفاء لكل بنات مصر".
- أمير طعيمة:
عبر الشاعر أمير طعيمة عن غضبه من ظاهرة التحرش وقصرها على ملابس الفتيات، قائلًا: "التحرش ممكن يكون له ألف سبب نفسي وسلوكي وأخلاقي قبل ما توصل لملابس الضحية اللي لا يجوز تكون مبرر ولا سبب، ولما نتكلم عن حادثة تحرش يبقي كلنا ندوس بجزمتنا على المتحرش الأول وبعدين نبقي نعمل التحليلات دي بعدين"، موضحًا "محاولة إحداث توازن وهمي بين الجاني والمجني عليه جريمة".
- أحمد سعد:
كتب الفنان أحمد سعد على حسابه الرسمي على "انستجرام" عن انتشار التحرش الجنسي ضد الفتيات وقال: "محدش في الدنيا هيقضي على التحرش غير الرجالة، مش بعدم التحرش، لأ، الناس الشرفاء كثير
لكن بمساعدة الراجل ابن البلد الجدع لما بيشوف أي ست، في راجل مش هنقول راجل في ذكر بيضايقها هيقف له ويقف معاها".
- محمود العسيلي:رفض الفنان محمود العسيلي تبرير التحرش بأي طريقة ممكنة، قائلًا: "هو الناس بتحور في إيه ؟ تحرش يعني تحرش، هنجمله وهنبرره ليه والأهم من كده إزاي؟ المتحرش ده ميني مغتصب.. ده مرض لازم يتشال ويقتلع من جذوره، الست زي الرجل تعمل اللي هي عايزاه زي ما الرجل بيعمل اللي هو عايزه، كفاية ازدواجية وجهل بقى".
- نبيل الحلفاوي:
علق الفنان نبيل الحلفاوي على قضية التحرش قائلا: "الاستنفار القوي الحالي ضد التحرش والاغتصاب وضد كل من يبرره سيكون له بإذن الله أثره الفعال في تراجع هذه الجرائم، بشرط استمرار مواجهتها بنفس القوة والحسم، ولكن فلنحذر أن يفسد هذا التوجه ظهور ادعاءات كاذبة بغرض تصفية حسابات أو بحثا عن شهرة. هؤلاء أيضا يجب مواجهتهم بنفس القوة والحسم".
- إياد نصار:تفاعل الفنان إياد نصار مع قضايا التحرش، وطالب بأن يتم معالجة المتحرش بمستشفى الأمراض العقلية وأن لا يدخل السجن، وقال عبر حسابه على "فيس بوك": "بقترح إن التحرش يخرج من منطقة الجناية ويعامل معاملة الأمراض النفسية الخطيرة، التي تستدعي يتحط المتحرش في مستشفى الأمراض العقلية ويخضع لعلاج شديد، شديد جدا، أصله ده إنسان مش فاهم أن العلاقة بتحصل بموافقة الطرفين، ده شخص عنده خلل في دماغه، فالأهل ممكن تقبل أن ابنها يكون متحرش وخارج من السجن، شاب وطايش مع ابتسامه غبية، بس مش هتقبل يكون مريض نفسي وبيتعالج، بكده كل واحد هيعرف يربي ابنه إنه ما يطلعش مجنون".
- مراد مكرم:
أعرب الفنان والمذيع مراد مكرم عن استيائه من كثرة انتشار التحرش في الشارع المصري، وكتب عبر حسابه على "فيس بوك": "لما بنتي قالتلي على موضوع المتحرش والمغتصب ده وأنا مانمتش وقاعد بقرا في الموضوع، بنتك أمانة في رقابتك ليوم مماتك، حتى بعد ما تتجوز، أنت برضه ابوها وسندها وضهرها.. وانت يا أم نفس الشيء، انت الحضن والحنان والاحتواء أوعوا حاجة تبعدكم عن بناتكم ولا شغل ولا فلوس ولا سفر".
