وصفة نجاح الحلم.. عبدالفتاح العمدة

الحلم كان فكرة.. قدرت مع الإصرار
تحيي أمل بكرة.. وتكمّل المشوار..
والفكرة في الأول.. كانت يقين في الله..
لو مهما ليل طوّل.. لازم هييجي نهار..

اللي فشل إنسان.. واللي نجح إنسان..
والفرق بين الاتنين.. الصبر والإيمان
بإن الحياة اختيارين.. لكن طريق واحد..
هاتكملّه أو لأ.. القدرة جوّه قرار
الحلم كان فكرة.. نجحت مع الإصرار

الدنيا مش سودا.. ولا هي بالألوان..
زي أمّا ترسمها.. في اللوحة ليك بتبان
إيه ذنبها الريشة.. الرّك ع الفنان..
بإيديك تكون جنّة.. أو نسخة طبق النار

لو تلعن الضلمة وتلعن أبو الأيام..
منتاش هتتقدم خطوة كده لقدام..
ولا عمرها انطالت بالشكل ده الأحلام
بطّل تلوم حظّك وتلعن الأقدار..

في ناس عشان تحبطك.. هتقول عليك مجنون
وهاتحتقر فكرتك.. وتكرهك في الكون..
نفّذها مهما تكون بسيطة في المضمون..
قصص النجاح كلها في الأصل كانت أفكار

ما تسيبش يأسك مهما كان يقتل طموحك..
خلّي الأمل جواك وساكنك زي روحك..
لو يوم يسوء الحظ.. جدد همّتك..
والهمة نار.. بتحوّل اليأس لبخار..

أوقات كتير عكس السفن تيجي الرياح..
لكن تملّي من الفشل ييجي النجاح
لو كل طير بيطير عشان مالك جناح..
كان النعام بجناحه أول صنف طار..

الفكرة إن الأمل محتاج خفّة ونشاط
كمّل ما تستسلمش ليأس أو إحباط
ولو انهزمت في شوط.. لسه الحياة أشواط
واللي مجاش مرة ييجي مع التكرار

خد كل شيء ع الجد وبطّل استهتار..
لا تتركن على كسل.. ولا تختلق أعذار
وإن مرة صابك فشل.. إوعاك في يوم تنهار
خليك في قوة جبل.. فيك الفشل يحتار
الحلم كان فكرة.. نجحت مع الإصرار