"الحمد للّه خلقني فقير رقيق الحال".. آخر دموع قلم "الخال"

كتب الخال عبد الرحمن الأبنودي، الذي لحق صلاح جاهين، وسيد مكاوي، في نفس يوم وفاتهم، منذ قليل، بعد صراع طويل مع المرض، أخر قصيدة له.

1_ لـ... مصر
ويا مصر.. وأن خيّروني.. ما أسكن إلَّاكي
ولاجْل تْتبسِّـمي.. يامّا.. ببات باكي
تسقيني كأس المرار.. وبرضْـه بهواكي
بلدي..!!.. ومالي إلّا أنتي.. ولو ظلمتيني
مقبولة منِّك جراح قلبي ودموع عيني..
الجرح يشْـفَى.. إذا بإيدِك لمستيني
كُلِّك حلاوة.. وكلمة «مصر».. أحلاكي!!
2_ ياللِّي تِصدَّقها
قالَّك ياريت الزَّمن ماعشِّـمَك يومها
ولا قالَّك اسعى وروح وأهي قومة وتقومها
إيه خدت مِ الدنيا إلا لؤمها.. ولُومْها؟!
ياللِّي تِصدَّقها.. ادفع حق تصديقك
أحزانك المُرَّة ماشي معاها من ضِـيقك
إنت تِلَمْلِمْها.. هية غاوية تفريقك
إنت تنوَّرْها.. صاحي اللي يضلِّمْها
وإنت الأصيل اللي مش بِتعوم على عُومْها
كترت عليك الهموم وِمْنَشِّـفَة ريقك
تابع طريقك.. تطيقك وَإلَّا ما تطيقك..
هل شُـفت فيه شمس وِحْلتْ مرَّة في غيومها؟!
3_ في الحلم
في الحلم.. جاني الوطن.. قاللّي: «حتعمل كيف
وإنت بليد.. والزمن ماضي وزيّ السيف؟
عُمْر الزمن ما أْتَمَر.. ولا مشى ع الكيف»
أنا قلت له: «يا وطن.. أمري ماهوش بِيِدى
وبين ميعاد وميعاد.. خانتني مواعيدي
لا طِلِع ميعادي.. ولا عيدي صبح عيدي
وكام ماغدّارة يادِنيا.. وبتكيدي
أنا كنت سِيد الزمن وادي الزمن سيدي
عملت ثورة ورا ثورة.. واديني ضيف
كشف غطايا الهوا.. والحلم كان تخريف
أحلامي رجعتْ لي تسكن في تجاعيدي
لا هانيلي لقمةْ طعام.. ولا شاي يردّ الكيف!!»
4_ حارس السجن
يا حارس السجن يا قارص على اقْفَالُه
ياللّي حبست الولد.. ماسألتهوش: «مالُه»؟!
لا تكون فاكرني حاوصِّـي وأقول: «على مهلك»..
أو.. «خِفّ إيدك عليه خوف لا الولد يهلك
الواد دا حِتِّةْ بطل.. مسجون وعارف ليه..
وراضي عن سجنُه يا سجَّان.. وساعى إليه
إنت اللي غلبان.. ومحتاج من يوصِّـي عليه
إنت اللّى في الأصل كان السجن يستاهلك
وهوّه زنزانته أمُّه... والليمان خاُله»!!
5_ سايق الهِجْن..!!
وإنت غريم الزمن.. حالف ما تتصالح
الضحكة عايمة تَمَلِّي فْ دمْعَك المالح
عمرك.. وبِتْعِيشُـه مُدَّة.. مودَّعه مُدَّة
أحلى ما في الريح.. بِتديك فُرصة تِتْحَدَّى
ويوماتى تِفْـطَر مع موتك.. وتِتْغَدَّى
والأصل في الشِّـدَّة.. تطلع مِنَّها فالح!!
■ ■
وأنا سايق الهِجْن.. ناقتي مش مطاوعاني
تُبصِّ لي بغربة زيّ ما أكون واحد تاني
ولا مُوَنِّسْها حِسِّـى.. زي ماكُنَّا..
عِشْـرة طويلة انطوت.. وكإننا هُنَّا
مين اللّي زرع الَجفا والفُرقة.. مابينَّا..؟
ولا عاد حُدَايا يخليها.. مِهاوْداني!!
6_ تاجر الحُبّ..!!
ويا تاجر الحُبّ.. كَيِّل لِي تلات قناطير..
يتفرقوا ع الحبايب.. من كبير.. لصغير
أرُشّ رشَّـة هِنا ورشَّة هِناك.. وأطير
ودا عِشْق لا يلْزَمُه تزويق ولا تحضير
سوق المودَّة جَبَرْ.. وِاتفرّقوا العُشّاق
واحد يشُـوفُه صباح.. واحد يشوفه مساء
بس الوطن أَلمعى.. وبيفرز الأسماء
وأنا.. في حب الوطن.. ساذج ماليش آراء
وهافرَّق الحُب حتى ع اللى مِشْ مشتاق
وبكره.. ربك لوحدُه يسَدِّدِ الفواتير..!!
7_ تاجر الصبر
يا تاجر الصبر.. ماتْخِلِّش في ميزانَك..
مِن حُوجْتى للصبر ساكن جنْب دُكَّانَك
قلبي يمامة تِهجّ تهجّ.. وتجيني
لا يهمها مِنْ أنيني أوْ دموع عيني
فاعمل لّي تحويجة.. من صبرك وإحسانك!!
■ ■
يا تاجر الصبر ما انت شايفني مش صابر
الكسر بِيدِي.. أنا المكسور وأنا الجابِر
الحلم خدني صحيت وأخدني من تاني
كإني لا نمت ولا فيه حدّ.. صحَّاني
الصبر مايفوتْش على اللي دمعهم حاضر!!
■ ■
سامع دموعهم سَمَع.. دمع الفقير ليه صوت
دمْعَه بطول السنين. من الميلاد.. للموت
الفقرا.. ربك عشانهم بسّ.. خلَق الصبر
والصبر زاد الفقير.. من وَلْدِتُه.. للقبر
ما هو لولا صبر الفقير.. إزاي حياتُه تفوت؟!
■ ■
يا تاجر الصبر.. أُمَّه بتنتِظر ع الباب
كوِّم وكوِّم.. ولا تسألش ع الأسباب
الصبر لوْجِهْ بفايدة نبوسوا أجفانك
ونسوق محّبتنا ودُعانا.. لِدُكَّانك
يا تاجر الصبر إطلع مَره مش كداب!!
■ ■
صابر على الجرح لا باعاني عطش ولا جوع
وإنْ ما شافتني عينيك.. صوت الدموع مسموع
مال النخيل ع المصاطب خُد مكان في الضِّـل
علميى أصبر على الغريمين عدو أو خِلّ
واذا ما شوفناش نتيجة.. نغير الموضوع..!!
8_ عشان الحبايب
فرَّعْت يا شوق عيدانك من عيون ناِيِيي
وأنا باملك إيه غير مودَّة وحِزن وِنَوايِيي
والقلب ساقيةْ بُكا.. فاضي.. وملاَّييي
وعامل إيه يا غزال؟!
■■■■
صياد.. لفعْت السهام والقوس على كتفى
شارد لقيتك.. عينيك صيّاد.. وبرَّيَة
رميتني.. سهم العيون جاب قلبى من كِتفى
واتارى للِّيلِ قوس.. وسهام.. وكراهيَّة
صابنى وصابك!!
■■■■
والليلِ شرّانى.. وقّع منى بُستانى
وقطّع الخيط وشحَتْر تحتي مُرجاني
نُصّين بقيت يا قمر مين يُلْضُمك تاني
ومين يِرَوَّقْ عَكَار الكلمه في لساني
ويا هلترى تعود تجود بالودّ يا زماني
واقعد مع الوِلْف اكمّل لقمتى وشاييي؟!!
9_ بانام براحتي
الحمد للّه خلقني فقير رقيق الحال...
لاطْلِعت تاجر ولاطلعتِش رجُل أعمال
لا مْسَاوَمَة.. ولا غش
ولا باشوف الدنيا من خُرْم قرش
ولا باشيل الميَّه في الغربال!!
■ ■
والحمد للّه.. خلقني حِتَّة من ناسي
وبانام براحتي.. لإنّ فراشي بمقاسي
مكفىِّ بيتي حلال
وكلّ من شافني يقول: «يا خال»
عابر سبيل.. ورأيي من راسي!!
■ ■
سنين تجرجر سنين عدِّت وانا منّي
وعمري ماخُـنت ولا حتى اللّي خاينيني
وأسرة متخنَدقَة متشالة في النِنِّي
وبيت.. جيراني تزيد في محبِّتْه عني!!
■ ■
والحمد لله.. وهبني قلم مابيخونِّيش
عُمره ما يمدح ومستنِّي طلوع العيش
قلم واخدها جدّ
ساعة ماتشتد الهموم.. يشتدّ
وساعة الضّنْك بينام ع البُروش والخيش!!
■ ■
وعملت قُبة جميلة... وتحتَها مَرْقَد
في آخر الرحلة هافرش فيه واتمدَّدْ
لِنُوم بلا صحوة
ماحاخدش في إيد الزمن غَلْوة
وكل ألوان هتهرب.. ماعَدَا الأسْوَدْ..!!
10_ صوتي
أنا باشكر اللي خلق لي الصوت وأوصاني
أقول كلام حُرّ.. مايقبلْش لون تاني..
مااسكتش ع الضيم واهشّ الغيم بقولة آه..
وإن سَـرَقُوا صوتي بيْنسُـوا ياخدوا قولة آه..
في الفرْح.. في الجرح إيه حيلتي إلّا قولة آه
يحميك يا ولدي.. وكنت اسكت وتتكلِّم
يحميك يا ولدي وأكون مجروح.. وتتألِّم
ياما حَرَسْت النهار.. آدي النهار.. ضَلِّم
وإن شفت جرح الوطن جوَّه الفؤاد عَلِّم
تقول كلام.. يا سلام.. يحييني من تاني.