السيسى لرجال الصناعة: معندناش وقت نضيعه فى الدراسات والموضوعات المحسومة

وجه الرئيس عبدالفتاح السيسي، حديثه للمهندس شريف الجابري، رئيس مجموعة بولي سفن للأسمدة والكيماويات، قائلًا: «إحنا بنستورد الصودا من بره كمنتج نستفيد منه في الأنشطة الصناعية الخاصة بنا، إنت محتاج تعمل دراسة جدوى وتشتغل على إنتاجها». 

وأضاف الرئيس السيسي، خلال كلمته بافتتاح الملتقى والمعرض الدولي الأول للصناعة، اليوم السبت: «يا جماعة لما طرحنا المشروعات والقائمة اللي قولنا عليها عبارة عن أدوات ومستلزمات إنتاج مصر تحصل عليها منذ سنوات طويلة جدًا، وقولنا القوائم دي موجودة في وزارة التجارة والصناعة والبنك المركزي ووزارة المالية، ومتاحة كبيانات، ووضعناها في قائمة 150».

وتابع: «جدوى الموضوع محسوب، ولو بعمل موضوع مش عارف أبعاده والسوق محتاج إيه هأقول أني محتاج أجيب متخصصين يدرسوا المشروع ده ويقولوا محتاج ولا لأ، قبل ما أقدم عليه وأنفذه، وكل الكلام اللي اتكلمنا فيه في ابدأ هو عبارة عن مشروعات لمستلزمات إنتاج أو منتجات يحتاجها السوق المصري».  

وأردف: «هدفي من اللي بقوله لكل الحاضرين دلوقتي من رجال الصناعة، وبنقول إنه مبقاش عندنا وقت نفقده أكتر من كده في الدراسات والموضوعات المحسومة».