«25 ألف ساعة عمل بلا توقف».. الرئيس السيسى يكشف تحديات إنشاء «حقل ظهر»
تحدّث الرئيس عبد الفتاح السيسي عن مشروع حقل ظهر للغاز، قائلًا: «الموضوع ده مكنش ممكن يتعمل إلا إذا كان فيه ترسيم للحدود مع قبرص واليونان في البحر المتوسط والسعودية في البحر الأحمر، مكنش فيه شركات هتنزل تعمل تنقيب في المناطق دي إلا إذا كان عندنا ترسيم حدود».
وأضاف الرئيس السيسي، خلال فعاليات اليوم الأول من المؤتمر الاقتصادي – مصر 2022، اليوم الأحد: «الحقل ده لو مش موجود دلوقتي مصر كانت تبقى مطفية، ومعندناش فلوس ندفع كل شهر 2 مليار دولار للغاز عشان ندي محطات الكهرباء، ولو بالأسعار الجديدة دلوقتي قد تصل لـ10 مليارات دولار، يعني 120 مليار دولار في السنة، أجيبهم منين؟».
وتابع: «لازم تعرفوا إن ربنا سبحانه وتعالى والموضوع كله ربنا، لأننا لما جينا نعمل الترسيم الناس كلها هاجمتنا وقالت إنتوا بتعملوا الترسيم ليه؟ ولما ربنا يسر الأمر وعملنا الحقل ده، وقلت إن أي مشكلة تخص الترسيم أنا هحلها».
وأردف: «اتحركت معدات حفر بالآلاف عشان نجهز البنية الخرسانية. من فضلكم اللي انتوا شايفينه ده 25 ألف ساعة عمل بلا توقف مني ومن الدولة، عبارة عن 7 سنوات واضرب في 10 ساعات في اليوم على الأقل، اللي حصل ده بالله ولا كان يحصل أبداً».
