بسبب التنمر.. طالب هندسة بكفر الشيخ يفقد 47 كيلو جراما من وزنه (صور)
عاش حياة صعبة بسبب وزنه الزائد، الذى كان سببًا فى ضياع الكثير من الفرص عليه، وبات كابوسًا يُواجهه فى كل مكان ذهب عليه، ولاسيما وهو يُحاط بنظرات إشفاق الكثير من أصدقائه، وزملائه، فضلًا عن الكلمات اللاذعة التى كانت لا تُسمن ولا تُغنى من جوع، ما زاداه إصرارًا على التخلص من وزنه الزائد، حتى يعيش حياة طبيعية مثل الآخرين.
محمد صالح عبد المنعم، صاحب الـ23 عامًا، ابن محافظة كفر الشيخ، والطالب بكلية الهندسة جامعة الدلتا للعلوم والتكنولوجيا، الذى استطاع أن يخسر حوالى 47 كيلو جرام من وزنه، فى 10 أشهر فقط، وخلال أقل من عام، فى بادرة بدأت بالتحدى، ونجحت بالإصرار، وتحققت بالعزيمة، وبتشجيع من الأهل والأصدقاء.
"الدايت.. أسلوب حياة"، بهذه الكلمات بدأ "محمد صالح" سرد حكايته لـ"الدستور"، عن فقدان 47 كيلو جرام من وزنه، وذلك تشجيعًا منه للآخرين على فقدان وزنهم الزائد، والانتقال من عالم السمنة والبدانة إلى عالم النحافة والرشاقة.
يقول "محمد": "حكايتى مع الدايت بدأت بالتحديد فى شهر أكتوبر من عام 2018م الماضى، فى البداية كان وزنى حوالى 135 كيلو، وروحت لدكتورة تغذية عشان ابدأ معاها وأروحلها مرة كل أسبوع، وفى الأول كنت ماشى على نظامها مدة معينة تقريبًا تلاثة أسابيع، وبعديها ابتديت أمشى مع نفسى من غير نظام ولا أى حاجة، والحمد لله كنت كل أسبوع وزنى بينزل عن المرة اللى قبليها، ومكنتش فى مرة زايد، وطبعًا أنا عملت رجيم كتير جدًا فى حياتى وكل مرة كنت بفشل بس المرة دى بفضل الله قدرت إنى أخسر وزن وكتير".
وأضاف: "مكنتش بحرم نفسى من الأكل الحاجة الوحيدة اللى كنت بعملها إنى أنا ما بتعشاش، بفطر فطار صحى وبتغدى الغدا اللى موجود بس مانع نفسى من النشويات والسكريات والمشروبات الغازية، وقرايبى كلهم كانوا بيشجعونى بصفة مستمرة وبيدعمونى، وليهم الفضل بعد ربنا سبحانه وتعالى، وناس جميلة طبعًا فضلوا جمبى من البداية لحد دلوقتى، منهم صحابى أكيد اللى كانوا محفزنى بردوا على موضوع الدايت والتخسيس ده وناس كتير بقى".
عانى "محمد"، كثيرًا بسبب وزنه الزائد من وتعرض للكثير من المواقف المحرجة، يروى منها: "اتعرضت للكثير من المواقف المحرجة بسبب زيادة وزنى، وطبعًا معظم الناس كانت بتقولى ياتخين لحد أما اتعودت على الكلمة دى، وكانوا بيقولولى أنت عمرك ما هتخس وهتفضل طول عمرك تخين، ومن المواقف الصعبة جدًا اللى مش بنساها كنت فى سكشن فى كلية الهندسة والمعيد كان بيسأل مين اتخن واحد فى السكشن طبعًا زمايلى كلهم شاورا عليا، وحسيت بحرج وقتها وزعلت جدًا، وده كان من ضمن الأشياء اللى حفزتنى على إنى أخس".
وأوضح "محمد": "كنت بخلص مصروفى على الأكل، وباكل بغباء بسبب ومن غير سبب يعنى لو جعان باكل ولو مش جعان برضه باكل، حاليًا مش ماشى على نظام دلوقتى يعنى ساعات ليا مزاج أخربها وساعات بنظم فى الأكل، ولما بنظم وقتها بفطر شوفان بالحليب قليل الدسم بسكر دايت، والغدا مثلًا سمك مشوى أو فراخ أو لحمة على حسب اللى موجود وجمبهم عيش أسمر طبعًا، والعشاء لو حسيت إنى جعان باكل فاكهة، وكمان بلعب رياضة فى الجيم، والحمد وزنى حاليًا 88 كيلو، بعد ما كان وزنى 135 كيلو، وخسيت 47 كيلو فى 10 شهور فقط، وخلال أقل من عام، وبتمنى أوصل لـ75 كيلو فى شهر 10 القادم إن شاء الله".
وتابع: "طبعًا فرق كبير أوى قبل الدايت وبعده، التخن ده معاناة كبيرة أوى الواحد مكانش مرتاح ومتعذب فى حياته ما بيعرفش يلبس هدوم كويسة على مقاسه، وبيدور على محلات بتبيع مقاسات خاصة، فين وفين على أما كنت ألاقى هدوم على مقاسى، والحمد لله دلوقتى مرتاح جدًا جدًا عن الأول بكتير وبقدر ألبس اللى أنا عايزه".
ونصح محمد الكثيرون ممن يُعانون من زيادة الوزن، قائلا: "الإرادة.. طبعًا الكلمة دى أنا شخصيًا زهقت منها بس أنا حطيت هدف قدامى، وقدرت أوصله حط هدف قدامك وإرادتك تبقى قوية وانت هتوصل للى انت عايزه".
