"محمد البرعي".. أقلع عن التدخين بالرياضة: "الرياضة حياة"

إدراكًا منه للمعنى الحقيقى لعبارة "الصحة تاج على رؤوس الأصحاء"، حاول أن يُحافظ على صحته بدلًا من تدميرها بالتدخين، وممارسة العادات السيئة، فلم يجد لذلك طريقًا سوى ممارسة الرياضة.

محمد إبراهيم البرعى، صاحب الـ22 عامًا، أحد أبناء مدينة بيلا، بمحافظة كفر الشيخ، والطالب بالفرقة الرابعة بكلية التجارة، والذى استطاع أن يتغلب على العادات السيئة لديه والتخلص منها تدريجيًا، وأقلع عن التدخين عن طريق ممارسة الرياضة.

"الرياضة حياة.. بهذه الكلمات بدأ "البرعى"، سرد قصته لـ"الدستور"، فى كيفية التغلب على العادات السيئة التى كانت تعوق حياته، من خلال ممارسة رياضة "الملاكمة" التى كرس لها كل وقته، وأصبحت جزءًا لا يتجزأ من حياته.

يقول "البرعى"، "في شهر 4 من عام 2018 اتغيرت حياتى، طبعًا اللى عارفنى كان عارف إنى بتاع خروجات، وقعدة القهاوى، وبشرب سجاير، وحياة ملهاش تلاتين لازمة، شهر 4 بدأت ألعب رياضة لأول مرة فى حياتى، وكنت مبطل قبلها بشهر سجاير نهائى لأنى كنت بقول كدا وبرجع المهم فى الموضوع لعبت ملاكمة وخضت تجربة جميلة أوى".

ويُضيف "البرعى"، "كنت بجرى يومين فى الأسبوع مع التمرين مشوار 4 كيلو رايح و4 راجع، وكنت بنزل تمرين حديد جالى فترة كنت بنزل تمرنتين مع بعض وكنت بجرى فى عز الشتا والتلج أقسم بالله اللى يشوفنى يقول عليا مجنون أنا وشعبان أنور أخويا وصاحبى اللى اتغيرت على ايده ومن أحسن الشخصيات اللى قابلتها فى حياتى ومحترم جدًا وكله عارفه بكدا وهو اللى شجعنى على لعبة الملاكمة، ثانيًا الكابتن محمد عبد الله جاد المحترم وأخويا الكبير اللى اتعلمنا منه الصلاة قبل التمرين، والالتزام فى التمرين، اللى بيدى لكل حاجه حقها فى التمرينة، اتعلمنا منه القوة والإرادة والعزيمة، وبعد كدا الوضع فى حياتى مكنش مجرد رياضة لعبتها".

يرى "البرعى"، أن الرياضة كانت سببًا رئيسيًا فى تحفيزه وتشجيعه على المذاكرة، والنجاح بتفوق فى عامه الجامعى الثالث، يُؤكد: "الحمد لله أنا تقريبًا الترم اللى فات ذاكرت ونجحت بمجهود وحسيت بقيمة النجاح أنا مش محرج خالص وأنا بقول الكلام ده لأن أنا دلوقتى حسيت بقيمة نفسى، وبالنسبة للصلاة هو أنا بقيت بصلى بس مش منضبط بس بدعى ربنا يثبتنا، والحمد لله اكتسبت من اللعبة صحاب جدعان وطيبين وخايفين على مصلحتنا أوى، كفاية أنهم بيحلمو ونفسهم يحققوا حاجة، ومبسوط جدًا إنى عرفت قيمة نفسى كويس، وأنا بقالى أكثر من سنة ونصف فى عالم الرياضة ومكملين بإذن الله، وحلمى من خلال دراستى فى كلية التجارة مشوار سفر لأنى بحب البيزنس وكدا بس الملاكمة مواصل فيها كرياضة فقط".

المحافظة على الرياضة هي نصيحة "البرعى"، لأقرانه من الشباب، يُتابع: "نصيحتى لكل شاب من سنى وأصغر دائمًا حافظ على الرياضة فى حياتك مهما كان مجالك، هتلاقيها سبب كبير فى إسعادك ورضاك عن نفسك، خلى عندك طموح دايمًا، ومحدش ييأس، وعافر باستمرار".