مبارك يستقبل مرسى .. في طرة !!

مبارك ضاحكاً: الموضوع خلص خلاص يا دكتور مرسى، فكر فى مشكلتك والقضايا إللى أنت جايلها هنا فى السجن، ده أنت داخل فى قضايا خيانة وتخابر وبلاوى زرقا، أنا باقول تشوف محامى كويس.

مبارك: أهلا دكتور مرسى، كنت أفتكر إنك هتطول فى الحكم أكثر من عام، وكنت فاكر عندكم كوادر لإدارة البلاد، لكن تعاملكم مع الشعب ومع الحكم كان فاشلاً بشكل كبير جداً جداً، وأنا بعد السنين دى كلها تأكدت إن وجهة نظرى فى الإخوان كانت صحيحة، أنتم كل مخططاتكم هدفها فقط الحكم والكرسى، وعمركم ما كنتوا وطنيين أو عايزين مصلحة البلد، والحمد لله أخذتوا جزاكم بدرى بدرى.

مرسى يرد وهو حزين ومكتئب وشارد الذهن: كل المشكلات إللى البلد فيها حتى الآن أنت السبب فيها، الفقر، والبطالة، والأمراض أنت السبب فيها، وبعدين أنت الشعب كله طلع عليك وخلعك لكن أنا ما زلت الرئيس الشرعى للبلاد، وهناك ملايين فى الشارع تطالب بعودتى للحكم، لكن أنت يوم ما طلعت من القصر الشعب كله كسر وراك 100 قلة وزير.

مبارك: الموضوع مش كده يا دكتور مرسى، أنا لما عرفت إن الشعب مش عايزنى قررت وبسرعة وبدون أى مشكلات أن أترك الحكم علشان أحمى البلد، لكن أنت وجماعة الإخوان المسلمين مش شايفين إن الملايين خرجت يوم 30 يونيو ويوم 3 يوليو، وفى جمعة تفويض الجيش ضد الإرهاب، أنتم يا إخوان زى ما انتوا طول عمركم لا بتتعلموا من التاريخ ولا من الأحداث الجارية، الشعب والجيش والشرطة والقضاء وكل مؤسسات الدولة قالت مش عايزاك ولا عايزة جماعتك، ليه التشبث بالحكم؟.

مرسى: إللى أنت مش عارفه يا أبو علاء إن الجيش إللى خانك وباعك فى ثورة 25 يناير هو إللى عمل انقلاب على الشرعية الدستورية التى أمثلها، ومهما طال الزمن سوف أعود للحكم لأنى الرئيس الشرعى، الشعب المصرى لن يقبل بنتائج الانقلاب، ولازم تعرف إن وضعى غير وضعك، أنت الشعب طردك بعد 30 سنة فى الحكم، لكن أنا الشعب معايا والجيش بس هو إللى انقلب على.

مبارك: يا دكتور كفاية لف ودوران، وكفاية تضحك على نفسك، إنت عارف إن كل ده ماحصلش ومابقاش يخيل على حد، يمكن الشعب زعل منى آخر سنة أو سنتين وخصوصا لما طلعوا فى دماغه موضوع التوريث لكن أنت خليت الشعب يكرهك من أول سنة، فى عهدك الفقر والفساد والجوع زاد، والأسعار وصلت لأرقام قياسية، أنا كنت أشوف فى التليفزيون طوابير الناس واقفين على البنزين والسولار وما كنتش مصدق حجم الفشل بتاعك وبتاع الإخوان، فين فلوس البلد إللى كنت سايبها فى البنك المركزى حرام عليكم أنت يا دكتور مرسى وجماعتك تأخدوا امتياز فى كراهية الشعب ليكم، تقدر تقول لى يا دكتور مرسى معملتوش مشكلة مع مين؟، إنتوا عملتوا مشكلات مع طوب الأرض، مع القضاء والإعلام، والشرطة والجيش، ياراجل فى حد فى الدنيا يشتم جيش مصر؟، وأنت ومرشدك وجماعتك تعرف تماماً إنه جيش وطنى ومحترم ومش ممكن تأخونوه أو تكرهوا الشعب فيه، لأنه فعلا من الشعب وللشعب.

مرسى: الجيش طمعان فى الحكم، وأنا الرئيس الشرعى، ولن يكون هناك أى رئيس غيرى ، إنت ناسى إن المجتمع الدولى كله معايا ولغاية دلوقتى بالنسبة لهم محمد مرسى هو رئيس مصر ماحدش معترف باللى حصل ده.

مبارك: دولى مين يا عم، اسألنى أنا على المجتمع الدولى بقالى معاهم 40 سنة، يا عم السياسى إللى عامل نفسك فاهم دول ماشيين بمبدأ مات الملك عاش الملك، إللى عملوه معاك ده حلاوة روح وشوية مجاملات علشان الاتفاقات إللى كانت بينك وبينهم، اوعى تكون مصدقهم صحيح .

مرسى: كل إللى جم هنا عارفين إنى الرئيس الشرعى، ومش ممكن يسمحوا للى حصل ده يمر.

مبارك ضاحكاً: الموضوع خلص خلاص يا دكتور مرسى، فكر فى مشكلتك والقضايا إللى أنت جايلها هنا فى السجن، ده أنت داخل فى قضايا خيانة وتخابر وبلاوى زرقا، أنا باقول تشوف محامى كويس.

مرسى: أنا بريء من كل التهم، وكمان أنا لى حصانة لأنى الرئيس الشرعى، ومحدش أبدا يقدر ينزع شرعيتى، والشعب كله يحامى عنى، وعلشان كده أنا مش محتاج محام.

مبارك ساخراً: يا دكتور مرسى سيبك من موضوع الحصانة والحضانة، قلتلك الموضوع خلص خلاص، أنت دلوقتى فى السجن، سجن طرة.

مرسى: لا يا حبيبى أنا هنا على ذمة التحقيقات، مفيش قضية على حتى الآن، مش كل الناس زى بعضها، وبعدين أنا كلها أيام ويمكن ساعات وأرجع لقصر الاتحادية وكل من شارك فى الانقلاب هأدخله السجن هنا معاك.

مبارك: والله إنت صعبان على يا دكتور مرسى عايش فى أوهام أنت وجماعتك، وبدل ما تعترفوا بالخطأ، وترجعوا عنه وتتوقفوا عن إللى بتعملوه فى رابعة وغيرها، لازم تعرف يا دكتور مرسى إن الشعب مش عايزكو، والجيش فقط انحاز لمطالب الشعب وحقق مطلب الشعب النهائى برحيلك عن الحكم، أنا كنت أسمع الناس بودانى فى التليفزيون وهما يقولوا ولا يوم من أيامك يا مبارك.

مرسى: دول الفلول يا أبو علاء، لكن الشعب إللى خرج عليك فى 25 يناير مش ممكن يقول كده، الشعب كله معايا وهيرجعنى للقصر قريب جدا، لأنى الرئيس الشرعى إللى انتخبنى الشعب المصرى فى انتخابات حرة نزيهة بشهادة العالم كله إللى رافض الانقلاب، لكن معلهش يا أبو علاء الانتخابات بتاعتك كانت كلها مزورة وكذب فى كذب، وكفاية الانتخابات البرلمانية عام 2010.

مبارك: مشكلتكم أنكم جماعة محدودة متعرفش تشتغل إلا فى السر وفى الضلمة، ولما طلعتم فى النور اتكشفتم، وإنتو ارتكبتوا أكبر غلطة فى عمركم.

مرسى: إيه هى أكبر غلطة يا أبو علاء؟.

مبارك: إنكم خنتم مصر وشعب مصر كل الناس عارفه كده، بقالك سنة فى الحكم وعاوز تبيع البلد كده عينى عينك سينا وحلايب و قناة السويس، إيه يا دكتور إنت بتحكم عمى ولا إيه، بطن الجماعة بتاعتك دية طلع زى المحيط عايز يبلع بلد زى مصر، طول عمرى أقول عليكم أغبياء ومتغطرسين وعاديتوا كل الشعب.. كل الشعب.

مرسى: الجيش خاين، وزى ما خانك خانى.

مبارك: لسه هاتقول الكلام ده تانى، أنا سبت الحكم علشان أحافظ على البلد ولما سبتها وبمزاجى سبتها للجيش لأنهم الوحيدون إللى يعرفوا يحافظوا عليها، والنبى ما أنت فاهم حاجه أنا باقول تقوم بقى تكمل أوراقك وربنا يوفقك فى طرة.

■ كاتب ومحلل سياسى