تاجر حيوانات أليفة: "حالنا وقف بسبب تعويم الجنيه"

تسببت الأوضاع الاقتصادية التى تمر بها البلاد وانخفاض مستوى معيشة كثير من الأسر فى الاستغناء عن شراء سلع ترفيهة، ويشرح محمد العربى مدير أحد محال بيع الحيوانات الأليفة بمدينة نصر تأثير ارتفاع الأسعار على هذه التجارة.

يقول "محمد"، 40 عاما: "بدأت في تجارة الطيور وكنت شغال في الدواجن وسبتها منذ أنفلونزا الطيور واتجهت إلى تجارة الحيوانات الأليفة وبقالي فيها أكتر من 15 سنة، لكن الأيام دي الحال واقف ومفيش حركة بيع ونسبة الربح ضعيفة جدًا".

وأضاف: "من ساعة تعويم الجنيه والأسعار أصابها الجنون، فالكلاب أسعارها تتراوح من 500 جنيه إلى 15 ألف جنيه، والقطط من 350 إلي 2500 جنيه، والأكل يبدأ سعره من 12 إلى 450 جنيهًا حتى حزام الكلب وصل إلى 150 جنيهًا".

واستكمل: "مفيش إقبال في آخر الأيام على الأكل الغالي اللي بيزيد عن 200 جنيه ولجانا لبيع الأكل السايب، الكيلو بـ40 جنيهًا يكفى قطة أو كلب لمدة شهر، والأكل الرئيسي اللي نعتمد عليه في المحل للقطط والكلاب هو الذرة والفراخ والزبادي".

وتابع: "الكلاب أكتر حاجة عليها إقبال في البيع، وتعد إجازة الصيف موسما، وأغرب موقف تعرضت له عندما جاءنى زبون يرجع قطة بعد 7 شهور وقالي دي بتاعتك".

وأوضح قائلا: "إحنا أكتر ناس أثر علينا الغلاء عشان بنشتغل في حاجة ترفيهية وأغلب الأسر رفعت شعار بلاها ترفيه، لدرجة أن ناس كتير سربت القطط في الشارع".

واستكمل: "أسعار أكل الحيوانات الأليفة خلال آخر سنتين زاد للضعف وده خلى تربية الحيوانات قاصرة على الطبقة العليا فقط لكن الطبقة المتوسطة تربي الحيوانات كتجارة لما تكبر تبيعها".