رحاب هاني تكتب: زوجة محمد صلاح.. نيللي كريم.. حلا شيحا.. قائمة تطول!

عموما انا ما بحبش التريندات بس الحقيقة ان فيه بعض النماذج البشعة على ما يسمى بمواقع التواصل الاجتماعي..

مع ظهور صورة زوجة محمد صلاح اثناء تكريمه تكاثرت التعليقات اللي على غرار:
-ايه ده هي لابسه كده ليه؟
-دي محجبة مش ممكن!
-مش شيك خالص، بلدي جدا!!
إلى آخر "الحِزن"
..
من فترة حلا شيحا حطت صورة على صفحتها بالنقاب وكاتبه عليها تعليق ما أشبه بـ ربنا يثبتني إلى آخره.. في نفس الوقت تقريبا نيللي كريم نزلت صورة ليها في البحر بالمايوه -(المايوه ماكنش كله باين بس واضح انها لابسه مايوه يعني)
..
فِي الناحيتين تلاقي:
اللي يقول شوف الخيمة اللي هي لابساها
واللي يقول بقى معقول دي حلا شيحا
والناحية التانية مش تحترمي ولادك لابسه مايوه
إيه ده مش ممكن نيللي كريم لابسه مايوه
..
بعيدا عن الواقعتين اللي أخدوا حيّز ساعتها على مواقع التواصل الاجتماعي -مش عارفه ليه بس ماشي-
أجد تماس حقيقي ما بينهم وما بين التعليقات اللي اتقالت عن زوجة محمد صلاح.. تعليقات بائسة وحزينة؛ اللي يدافع هنا.. واللي يشتم هنا.. وأنا هنا مش فاهمه!
..
بؤس ورخص وحالة فوران في إصدار الأحكام في المطلق على البشر..
كلنا عندنا رأي وكلنا بنؤمن بأشياء ومبادئ في حياتنا لا يعيبنا إطلاقا لكنه ده اساس انك تكون إنسان عاقل مفكر بس الأساس الأهم انك تبقى عارف ان دي مبادئك أنت وأفكارك اللي لك كامل الحرية في طرحها عرضها لكن ابدا ليس فرضها على الآخر.. والاهم ابدا ابدا لا تستخدمها لتجريح الاخر او التقليل منه لمجرد انه بيعمل حاجة او لابس حاجة مش على هواك اَي كان هواك ده ايه او إيمانك بيه قد ايه !
..
ملحوظة: تبدأ الآن تعليقات ليها علاقة بالنصح والإرشاد والصالح العام وموجة اخرى في إصدار الأحكام عشان تتأكد انه "مافيش فايدة" فعلا !