عمرو سعد: "اتضرب عليا نار.. ومش بتباهى بالشهرة"
أعرب النجم عمرو سعد، عن استيائه الشديد بسبب خروج مسلسله الجديد "بركة" من السباق الدرامى الرمضاني المقبل، قائلا: "كنت أتمنى إني أكون معاكم بس الظاهر إن اتضرب عليا نار.. بس أنا عاوز أقول إن اللي بيحلم يعيش جوه قلوب الناس عمره طويل جدا بيعيش ويلاطم الزمن بكل بلاويه.. وإن مفتاح البقاء هو الإخلاص في العمل".
وأضاف "سعد"، عبر حسابه الرسمي على موقع التواصل الاجتماعي "فيسبوك": "قررت أتكلم لأن الإشاعات كتيرة على المسلسل بتاعي والكل بيقول أي كلام.. وأنا عمري ما تاجرت بمعاناة ولا اتكلمت عن نجاح ولا تباهيت بشهرة؛ لأني مؤمن من يوم ما طلعت على أفيش أول بطولة في فيلمي الأول من عشر سنين إن بطل الناس واحد منهم، علشان كده دعيت ربنا ما أتغيرش وأظن ربنا استجاب".
وتابع: "علشان أفضل شايف من عيونكم وحاسس زيكم إنتم أهلي وعزوتي وناسي وقوتي ضد أي حد ممكن يحاول يعطلني أو أي فاشل مش فاهم أهمية اللي بيبني أو أي أعمى مش شايف إن التأثير الحقيقي على الأرض هو اللي بيحرك المشاعر ويغير ويطور تفضل قيمته زي الذهب ومع الوقت يغلي ويفك زنقة ناس محتاجة ساعتها تتغير أو تفرح وتقول لأولادها كان في هنا ناس زمان عايشين.. بني آدمين كان هدفهم ينوروا للناس لأن اللي بينفع الناس بيفضل في الأرض ده ربنا اللي قال كده.. قانون للحياة وحكم علي الأعمال".
واختتم كلامه، قائلا: "يا رب أكون كده، وأنا باحمد ربنا وباشكركم علي دعمكم الكبير والمجهود الكبير اللي عملناه هايوصل هايوصل إن شاء الله ومعاه تكبر المحبة والاحترام والثقة المتبادلة اللي أتمنى تدوم إلى أن يقضي الله أمرًا كان مفعولا".
