آية سالم: «هتعملى فورمة وانتي في البيت»

عندما كانت فتاة فى المرحلة الإعدادية تزن 140 كجم تقريبا، عانت من سخرية زملاءها، حاولت إنقاص وزنها خوفا من التعليقات السلبية مثل: «مش هتعرفي تخسّي، دي وراثة»، لتأخذ آية سالم وقتها قرارًا بتغيير حياتها تمامًا حيث أصبحت أوّل مدرّبة لياقة بدنية من المنزل.

«الدستور» حاورت «آية» عن مشروعها، ومدى استجابة الفتيات لفكرته ونتائجه عليهن.

*ما أول خطوة اتخذتيها لتغيير حياتك؟

رحت لدكاترة كتير، وحد فيهم اداني أدوية مبقتش اقدر آكل حاجه، وزنى نزل لـ 40 كجم، وبقي عندي جفاف وتهتك فى المعدة، تواصلت مع دكاترة مختلفين وكنت فار تجارب، أصبت بـالنهم، ووزني وصل 90كجم.

*متى قرّرتي تدرسي مجال اللياقة البدنيّة؟

وانا فى مرحلة الثانوي انتظمت فترة فى الجيم، وبعدين كسّلت، فجسمي ماظبطش، ف قرّرت إنى هدرس المجال وهعمل فورمة لنفسي وهعمل إسم فى المجال.

*هل واجهت صعوبات فى البداية؟

طبعا.. إحباط من كل اللى حواليا، ماحدّش كان مؤمن بيا، لكن كنت واثقة فى نفسي.

*ازاي تقدري تتابعى المتدرّبات معاكي؟

اتواصل مع كل بنت لوحدها على الفيس بوك، أو الواتس آب، لكن لازم فى الأول أشوفها وأعرف مقاساتها عشان أنظّم لها جدول للأكل والتمرينات المناسبة، وعندي صفحة على موقع فيس بوك، اسمها Fitness garage، بها حوالي71 ألف متابع، مهتمّة بكل مايخص اللياقة البدنيّة من أكل صحّي وتمرينات، وآمل أن تصبح تطبيق يمكن من خلاله الاستفادة مباشرة من مميزاتها.

*كم بنت تقريبا قدرت تعمل فورمة معاكي؟
فى أكتر من 400 بنت، والفورمة تحتاج من 6 شهور لسنة على الأقل.


اشتغلتي فى "جيم" قبل كدا؟

درست مجموعة دورات للّياقة البدنية، وحصلت على عدد من شاهادات الخبرة، وعملت كمدرّبة فى أشهر الأماكن فى مصر، لكن فضّلت أمرّن البنات من بيوتهم وهيقدروا يعملوا "فورمة".