«الدستور» تنشر قصيدة «السما سكة وصول» للشاعر مصطفى أبو مسلم

حصل الشاعر مصطفى أبو مسلم على المركز الأول بجائزة أخبار الأدب شعر العامية عن ديوانه «غريب يتهجّي الشوارع».

الجدير بالذكر أن الشاعر مصطفى أبو مسلم قد حصد جائزة ساويرس الثقافية عن ديوان غنوة مش للغنا، والصادر عن دار ميريت عام ٢٠١٦ غير أنه تحصل على المركز الأول في مسابقة ربيع مفتاح الأدبية في شعر العامية في دورتها الثالثة عام ٢٠١٦.

وتنفرد «الدستور» بنشر قصيدته «السما سكة وصول» من ديوانه «غريب يتهجّى الشوارع» الحائز على المركز الأول في مسابقة أخبار الأدب في شعر العامية.

السما سكة وصول
أمّي اللي بتنزل يومياً . .
وتلم هموم وقعت مني . .
ع السلم وأنا طالع بالليل . .
وتسيب حتة سمكة إتبقت من أكل قديم . .
للقطة اللي تمللي وجودها بيلوّن ورد السجاده . .
ويبدّل تفاصيلها بضحكة بدل التكشيرة المعتادة . .

أمّي اللي تمللي بنتخانق . .
و ف رأينا دايماً مختلفين . .
دايماً بتقولي إن أنا ملحد . .
رغم إني ماحبش سب الدين . .
من يوم مادخلتي المستشفى . .
لا الشمس بتشرق ونشوفها . .
ولا عاد بيجيلنا لبن م السوق . .
بستسمح كل حرامي شريف . .
يجي يسرق وجعك ويخبّيه . .
إنبارح كان قلبي واجعني . .
غسالتك جيت أغسله فيها . .
لفّت كام لفه وما إشتغلتش . .
جبتها ف شمال ف يمين مارضيتش . .
طلعته عصرته ف نزّل هم . .
مابقاش في دم بيوصلّه . .
النجفه إتخنقت سابت السقف . .
وقعت ع الأرض ميتين حته . .
قلّبت إنبارح ف القنوات . .
ماعادوش بيجيبوا حاجات تركي . .
تقريباً عرفوا إن أنا وإنتي كنّا بنتريق ع الدوبلاج . .
والوردة اللي إنتي زرعتيها جيت أسقيها كات مايله لتحت . .
مضربه دبلانه مابتبوصش على حاجه لفوق . .
طبطبت عليها مالت أكتر . .
دمّعت . . بكت
وشكيت . . ف شكت
فصّلت الشمس عليّا جاكت . .
ومازلت ف أوضتي حاسس بالبرد . .
أمي اللي البيت كان من صوتها قرب يتهد . .
همستلي إنبارح ف التليفون . .
وقالتلي بصوت شبه مقطّع . .
خليك وسط إصحابك أحسن ماتجيش الحد . .
دمّعت ف قالت بتعيط ؟
قولتلها نهائي مافيش حاجه . .
من بعدها قولنا كلام فاضي . .
وقولتلها أنا خارج دلوقتي . .
خيّطت الجرح اللي ف قلبي وربطته بشاش . .
ومشيت ف شوارع تعرفني وأنا معرفهاش . .