مدرب الفراعنة يكشف كواليس اللاعبين فى بطولة إفريقيا

كشف محمود فايز مدرب المنتخب الوطنى عن العديد من الكواليس الخاصة باللاعبين طوال أيام بطولة أمم إفريقيا التى انتهت فى الجابون.

ونشر فايز على حسابه الشخص بموقع التواصل الاجتماعي "فيس بوك" تفاصيل المعسكر كاملا، قائلا: "حوالي ٣٦ يوم فاتوا علينا مع بعض... جهاز فني واداري وطبي و لاعبين... فاتوا كالحلم... اشتغلنا وتعبنا وقاتلنا.. ضحكنا و بكينا.. سهرنا و قلقنا و فرحنا...من احلي ايام حياتنا".

وأضاف: "شكراً للاعيبه الابطال...اللي بجد ضربوا أقوي مثل للتحدي و الاصرار والعزيمه والتضحية... هنحكي لأولادهم وأهاليهم إنهم قاتلوا حتي النهاية... لحد آخر نفس... خرجنا مرفوعين الرأس بجهدهم وعرقهم".

وتابع: "هنحكي لأولاد النني إنه كان بيصحي كل يوم الساعه ٥ الفجر تقويات في حمام السباحة علشان يلحق المتشات..!! هنحكي لأهل مروان وعبدالشافي و كوكا وإكرامي والشناوي إنهم كانوا بيبكوا دم علشان الاصابه... وانهم قاتلوا للعودة".

وأردف: "هنحكي عن قتال صلاح وعبدالله ورمضان ووردة وفدائية طارق وابراهيم صلاح وتريزيجيه وتحدي الحضري وصلابة حجازي وعلي ورجولة فتحي والمحمدي وروح كهربا وعمر وكريم وطلبه ودويدار وسعد.. هنحكي بفخر و عزه عن ابطال 2017".

وأكمل: "احنا مخلوقين في الدنيا دي علشان نسعي و نعمل و نجتهد ومش لازم في الاخير ننتصر... فالانتصار نسبي... السعي و الجهد و العرق ده في حد ذاته انتصار... لان بجهدك وعرقك وتعبك خلاص انت انتصرت... كسبت... يمكن كان نفسنا نفرح الشعب الطيب الغلبان بالكاس بس قدرالله وماشاء فعل

وأتم: "شكراً لاخواتي في الجهاز الفني... الجهاز الطبي... الجهاز الاداري... الكل اخلص و اجتهد و تعب...!!! شكراً للناس كلها اللي دعمت ووقفت ورانا قبل البطوله و بعدها... ويارب نعوضها في كاس العالم 2018".