شاهد .. ظاهرة "الإسكيتينج" تجتاح شوارع مصر
لو بتتمشي بميدان التحرير أو خارج من محطة مترو السادات وشوفت ناس بطير في الهوا وبيعملوا عروض أكروباتية .. أطمن دول مش كائنات فضائية دول شباب الأسكيتينج وبيعملوا ايه .. بيسكيتوا، مصطلحات ومشاهد قد تكون غريبة لبعض المصريين وهي رياضة التزحلق وتسمي بالأسكيت، ولكنها أصبحت ظاهرة لا يخلو منها الشارع المصري، وتحديدا الأماكن الرئيسية مثل حديقة مجمع التحرير وشوارع وسط البلد وكورنيش الأسكندرية .
بدأت رياضة الأسكيتينج في الأنتشار بمصر منذ ٥ سنوات عن طريق محل أدوات رياضية بالأسكندرية أصحابه غير مصريين، وهم من نظموا أول مسابقة إسكيتينج لبعض من هواة اللعبة، وكانت تعرف عند المصريين بأسم "الباتيناج" ثم أخذت اللعبة مسلكا أخر حيث أصبحت موضة ورياضة أتخذها بعض الشباب لتخريج طاقاتهم السلبية من خلالها .
وتنقسم هذه الرياضة إلي عدة نوعان "إسكيتينج بورد" وهو عبارة عن لوحة خشبية ذو أربعة عجلات يستخدمها اللاعب في التزحلق وعمل عروضه الأكروباتية، والنوع الاخر هوإسكيتينج لينر وهو عبارة عن حذاء معدن به ٦ عجلات بأسفله يرتديه اللاعب ويستخدمه أيضا كواقي ضد الاصابات التي تلاحقه أثناء تزحلقه .
وتعتبر حديقة مبني مجمع التحرير بوسط القاهرة هي المركز الرئيسي لتجمع لاعبي الأسكيتينج ويبدأون في ممارسة هوايتهم بدءا من الساعة السادسة مساء كل يوم وينتظرون ان يأتي الليل حتي يبتعدون عن المضايقات الامنية علي حد تعبيرهم وكان اللافت للنظر ان هذه الرياضة لا تفرق بين ولد أو بنت فستجد مجموعات كبيرة كونوا صداقات عديدة من هذا المكان .
ويقول محمد فوزي طالب بأكديمية الشروق وأحد لاعبي الاسكيتينج "أنا بلعب رول إسكيت من سنة ونص تقريبا والفكرة جاتلي عن طريق اني كنت بلعب بالعجلة في وسط البلد وشوفت ناس بيلعبوا حاجة غريبة لفتت نظري وكل معلوماتي عنها أنها باتيناج زي ماكنا نعرف واحنا صغيرين، وبعد كده دخلت أتعرفت علي اللي بيلعبوا ورحبوا بيا جدا وُضلوا يساعدوني لحد ما أتعلمت ودلوقتي بلعب معاهم، وطموحي في اللعبة مالوش حدود وكل الأسكيترز نفسهم يكون فيه إسكيت باركفي مصر يجمعنا كلنا علشان نبعد عن حوادث الطريق والمخاطر اللي بتواجهنا بالشارع " .
إسلام محمد طالب كمبيوتر ساينس لاعب إسكيت رولر قال " فكرة أختيار المكان جاتلنا بسبب ان ميدان التحرير قريب من كل الناس وكمان مساحة واسعة وزرضية مستوية، وفيه أماكن تانية زي رصيف سور نادي الزمالك وشارع الكوربة بمصر الجديدة،سعر حذاء الاسكيتينج الصيني ب ٤٠٠ جنية ولكنه غير جيد وبيتباع في محل بمنطقة عابدين ولكن الأفضل الحذاء المستورد علشان بيكون خاماته نضيفة وبيستحمل وبيوصل تمنه إلي ٣٠٠٠ جنية، الاسكيتينج مش موضة وهتنتهي دي رياضة أوروبا كلها بتلعبها بس نفسي في مكان نمارس فيه رياضتنا عشان نبعض عن مخاطر الشارع وأنا واحد من الناس قبل كده وأنا بجري وبسكيت عملت حادثة تاكسي خبطني وكنت هموت بس ربنا سترها ورجلي بس اللي اتكسرت وقعدت في البيت ٣ شور "
حواء طاهر طالبة بجامعة عين شمس لاعبة إسكيت تقول " فكرة الاسكيتينج جاتلي بسبب اني كنت بحب أركب عجل كتير وكمان واحدة صاحبتي هي اللي حببتني في الموضوع وكمان كانت عندي أزمة في حياتي خرجت منها بممارسة الأسكيت، وأنا كبنت بتعرض لمضايقات كتيرة في الشارع ولكن بحاول أرد ع البعض وأطنش البعض الاخر علشان أحافظ علي توازني لاني مش هخبط في حاجة علشان شوية تفاهات، في البيت عارفين اني بلعب سكيت وبيشجعوني كمان بس طبعا مش بيوافقوا اني أدخل مسابقات والجو ده خوفا عليا طبعا ونفسي يكون فيه أتحاد للعبة ومكان نمارس فيه هوايتنا المفضلة "
مي طالبة بالثانوية العامة لاعبة إسكيت قالت " أنا اصلا كنت بتدرب سباحة وبحب الرياضة جدا ولما شوفت الاسكيت نسيت السباحة خالص علشان الاسكيتينج حاجة جديدة بالنسبالي وكمان انا كنت بعاني من حالة توحد ومكنش عندي اصدقاء، وفي البيت مرحبين بالموضوع وبيشجعوني كمان طالما مش بتأثر علي دراستي، ومش هبطلها خالص حتي لو أتجوزت هشجع جوزي أنه ينزل معايا نلعب إسكيتينج "
