"خناقة" بين الإبراشي ورئيس قطاع الآثار بسبب "بيع حجارة الأهرامات"

نشبت مشادة كلامية بين محمود عفيفي، رئيس قطاع الآثار المصرية، والإعلامي وائل الإبراشي، على الهواء في برنامج "العاشرة مساءً"، المُذاع على فضائية "دريم"، بسبب "بيع أحجار الأهرامات".
وقال "عفيفي"، "الصحفيين اللي عملوا كده لازم يتحاكموا، وواحد منهم اعترف أن الحجارة في مقر الجريدة، وده إثبات عليه".
ورد عليه الإبراشي قائلًا "إنت ماسكلنا العصاية وهتعملنا الأدب، احمى الهرم أولًا، المفروض تشكرهم مش تهددهم بالحبس، وإنهم كشفولنا خلل في التأمين".
وانفعل عفيفي قائلًا "مبحبش الأسلوب ده، في خلل في التأمين وهحاسب الناس بتحقيقات إدارية، لكن ده لا يعفيهم من المسئولية".
ورد عليه الإبراشي "دول عملوا كده عشان يكشفوا فساد، شكلك مش متابع الصحافة ولا مهنة الآثار"، لينفعل "عفيفي" قائلًا، "بتتصل بيا ليه طيب لما انا مش متابع، اتكلم في اللي يخصك".
وقال الإبراشي "بتصل بيك عشان نحاسبك وعشان إنت مسئول، وانت داخل من البداية تعملنا الأدب، وإنت مش أمين على الحضارة".. ليرد "عفيفي"، "مش إنت اللي تحكم عليا، أنا أمين على الحضارة".

وكانت الإدارة العامة لشرطة السياحة والآثار، برئاسة اللواء أحمد مصطفى شاهين، تمكنت من ضبط 3 أشخاص يعملون "خيالة"، والمتسببين فى بيع أحجار أثرية من الأهرامات لروادها من السائحين الأجانب والمصريين، بأسعار تتراوح ما بين 250 جنيها وحتى 5 آلاف جنيه.