شاهد.. وصلة ردح بين "عمرو أديب" و"خالد صلاح" على الهواء

نشبت مشاداة كلامية بين الإعلامي عمرو أديب، والصحفي خالد صالح، رئيس تحرير "اليوم السابع"، على الهواء، في برنامج "القاهرة اليوم"، المُذاع على فضائية "اليوم"، بعد كتابة صلاح مقالًا ينتقد فيه التقصير الأمني في حادث تفجير فندق العريش، ووضع صورة على المقال وهو يضحك.

وهاجم "أديب" صلاح قائلًا: "منزل مقال تنتقد فيه، طيب استنى لبكره، والصورة اللي نازلة مع الموقع وأنت بتضحك، حتى الموقع بتاعك معندهمش إحساس بالمسئولية ومنزلين ليك صورة وإنت بتضحك".

ورد عليه "صلاح" قائلًا: "أن كل دول العالم تنتقد التقصير الأمني بعد وقوع عمليات إرهابية، وفي فرنسا بعد الحادث الإرهابي في اليوم التالي انتقدوا الأمن وتحدثوا عن التقصير، وإديني مساحة أرد لإني كان ممكن أرد في مكان تاني، الهوا بتاعك وأنا من حقي أرد، وأنت مش هتزايد على وطنيتي".

ليقول "أديب"، منفعلًا "مش في ليلتها يا أخي، ورد في مكان تاني يا خالد، دي صورة تنزلك في الموقع".

وقال "صلاح" ما نزايدش على بعض يا عمرو، والخناقة متبقاش بينا، وأديني حقي في الرد لإن أنت اتكلمت عليا، وده حقي قانونيًا ومهنيًا".

ليهاجمه "أديب" قائلًا: "أنت عامل خناقة بينك وبين الشرطة والجيش والبلد، وأنت مش داخل الهوا بمزاجك".

ليرد صلاح منفعلًا "كده هفهمك غلط، أنا دخلت عشان بحترم البرنامج، الانتقاد اللي وجهته صحيح وتصورك إن البلاد اللي بيحصل فيها عمليات إرهابية مفيهاش نقد تبقى وهم، والمقال بيعالج ثغرتنا مش بيأذي حد".

واستمر أديب في هجومه قائلًا: "أنت ما تقيمنيش.. شوف الصورة لما تعرف تنزل صورة صح مع الخبر بتاعك، ناس ميتة وأنت بتضحك، اعرف يعني إيه مهنية".

ليرد عليه "صلاح" منفعلًا: " ده تجاوز يا عمرو وخروج عن الأدب، دي قلة أدب غير مقبولة".

وقال "أديب": "أنا مؤدب، تقبلها ولا متقبلهاش، روح بص على الموقع يا راجل بلا قرف تعبنا بقى حرام عليكم".

لينفعل عليه "صلاح" قائلًا: "مش إنت اللي تزايد عليا يا عمرو أنت أكتر واحد عندك أخطاء، متخلنيش أقول كده، وممكن أطلع أخطائك واحدة واحدة يا حبيبي، وعندك بلاوي سودا".

ليهدده "أديب" قائلًا: "بلاش بدل ما نتكلم بعلاقتك خيرت الشاطر ونطلع القديم".