إنسان ورق.. عبد الفتاح العمدة

علّقت روحك بالـ"مفيش" عشمتها
اسمك بيظهر ع الأفيش دور انتهى
أو باقي فيه حبة مشاهد كلّها
متطابقة تشبه للي فاتت قبلها..

نفس السيناريو ونهاياتها موحّده
هو انت رايح بس بيك على فين كده
عايش مشتت وسط دنيا معقده
عابر سبيل في براح جراح مالهوش مدى
عمرك بينزف فوق ركام حبّة تجارٍب
سايب حنين للذكريات جواك موارب
وسط الظروف المؤلمة عمال تحارب
في حرب مانتاش قدّها..
علّقت روحك بالـ"مفيش" عشمتها

عذّبت قلبك تحت بند اسمه النصيب
تتساب تسيب فطبيعي كان إنّك تشيب
قبل الاوان / وبقيت كيان مليان كراكيب
مفيهوش مكان لشعور أمان / كُتر الوجع
خلاك تغيب عن وعي قلبك بالحياه..
فبقيت كئيب.. شخص انطوائي ومنعزل
عايز تسيب الدنيا والناس كلّها..

إنسان ورق.. والدنيا ملياك شخبطة..
ما عادش فيك ولا ملّي ينفع للكتابة
قلبك بخوف بيدق دقات مُحبطة..
ماشي في سكة حزن مفروشة بكآبة..
قدام عنيك كل السُبُل متلغبَطة..
نفس السؤال وتملّي تهرب مـ الإجابة..
هو إنت ليه؟
علّقت روحك بالـ"مفيش" عشمتها..؟