أجرأ آراء المواطنين في «رئيس وشعب».. ورد السيسي عليها (فيديو)

تضمن فيلم «رئيس وشعب»، تقريرًا من الشارع يرصد آمال وأحلام المواطنين في المستقبل وآرائهم في الفترة الأولى من حكم الرئيس عبدالفتاح السيسي، وجاء فيه بعض الآراء «الصريحة جدًا».

الرئيس السيسي شاهد التقرير الذي عرضته عليه المخرجة ساندرا نشأت، ورد على بعض النقاط التي سجّلها في مفكرة أمامه.

«أخاف أتكلم أتحبس، وبلاش تتكلمي عشان مايحصلكيش حاجة»، «الصحة في الحضيض»، «يصعب علينا تاريخنا وإحنا في الوضع ده»، «لازم الرئيس يعيش الشباب، ويأمن مستقبلهم»، و«الرئيس عمل مشاريع، وقناة السويس لكن مش حاسة إن دي حاجات تمس المواطنين، إحنا ماستفدناش حاجة بالمشاريع دي»، «أنا مابصليش، ماحدش يقول عليا إخوان»، هذه أبرز الآراء التي تضمنها الفيديو ورد الرئيس على بعض منها.

وقال السيسي: «هناك نقطة واحدة أريد أن أقف عندها، وهي موضوع الأمن والأمان، المواطن يشعر بأن هناك رقيبا على كلامه، وهذا كلام غير صحيح تمامًا».

وأضاف: «اللي بقوله دا مش سياسة اتكلم زي مانت عايز، لكن فكّر كويس في كل كلمة بتقولها، الناس حرة تمامًا في كل آرائها وتصرفاتها، لكن اللي مش حرة فيه إنها تؤذي البلد».

وعلَّق الرئيس على مقولة أحد المواطنين في التقرير الذي قال «إحنا محتاجين المم»، قائلًا: «الطفل اللي هيتولد مش محتاج أكل بس لكن محتاج تربية وصحة وتعليم».

وزاد: «الشخص اللي بيقول عندي 5 ولاد ومش عارف أصرف عليهم، طب إنت خلفتهم ليه لما مش هتعرف تصرف عليهم؟، الدولة بتحط حوالي 50% من تمن الوقود، أي حد من اللي اتكلموا عندهم بطاقة تموين».

وأشار إلى أنَّ «الدولة تقوم بدعم احتياجات المواطنين، فأنبوبة البوتاجاز بتتكلف 130 جنيه، وبنبيعها بـ30 جنيه، والدولة بتدفع أكثر من 50% من ثمن بنزين 80، والبطاقة التموينية كانت بقيمة 15 جنيه، الآن أول أربعة بياخدوا 200 جنيه، كانت في الأول 15 جنيه».