تصرفات بسيطة تحسسك إنك إنسان أفضل
- لما تكون في مطعم واتبقى أكل، اطلب تاخده تيك أواي.. واديه لأي حد غلبان في الشارع.
- في العربية، علق كيس على الفتيس وخليه كيس الزبالة. ارمي فيه المخلفات ولما تعدي جنب صندوق زبالة ارميه فيه.
- حدد يوم في الاسبوع تبعت فيه رسالةايميل لحد بقالك كتير ماسألتش عليه. وهاتلاقي كتير شغلتك الحياة عنهم.
اجبر بخاطر حد. ماتتكبرش على حد. ماتستعرّش من حد! لو وصلت لمنصب ماتحسش انك بقيت احسن من صحاب زمان.. كون متواضع وخلي وجودك في الدنيا سبب في إسعاد الناس حتى لو بسؤالك عنهم.. ولو ماقدرتش تسعد الناس فعلى الأقل ماتئذيهمش باستعلاءك عليهم!
- لما تلاقي حملة تبرعات أو حد فقير ومحتاج فعلا، مد ايدك في محفظتك واديله أي حاجة..حتى لو مابصتش عالورقة اللي طلعتها. تأكد إن الفلوس اللي بتروح في الخير بتيجي تاني. العطاء ومساعدة الغير بيحسن صورتك الذاتية ويزود تقديرك الذاتي وبيديك شعور طيب تجاه نفسك، وده هاينعكس في النهاية على أداءك وحياتك.
- مفيش يوم يعدي إلا لازم تقرا فيه حاجة من كتاب مسلي ومفيد معرفيا. حتى لو صفحة واحدة. سيب كتاب في الحمام -لو بتقرا في الحمام- أو جنب السرير عشان تقرا فيه قبل ما تنام، بدل ما تلعب في الموبايل.
محدش يعرف يغير الكون.. لكن تصرفات بسيطة زي دي هايلاحظها أي حد بياكل معاك في مطعم، أو بيركب معاك العربية، أو ابنك اللي بيشوف تصرفاتك.. وممكن يقلدك فالدايرة توسع.. تبقى عالأقل سبت تأثير في اللي حواليك، وهم يسيبوا تأثير في اللي حواليهم.. ومحدش عارف التأثير هايوصل لحد فين.
