سكون.. فرق توقيت

#فرق_توقيت
التوقيت.. مفروغ منه إنه مهم جدًا والوقت إللي بيعدي مبيتعوضش.. يمكن في مننا مستوعب الفكرة دي وبيعملها حساب..
لكن زي ما العامل الزمني مهم جدًا في اتخاذ القرارات المصيرية في النتايج والأهداف وأي مخططات وبرامج..

له نفس القدر والأهمية وبيلعب دور كبير في المشاعر الإنسانية..

عارف المفاجأة بتفرحك ليه حتى لو بسيطه؟
لأنها حاجه مش منتظرها فمستهلكتش من أعصابك دقايق وساعات منتظر تحقيقها..

العامل الزمني.. الوقت..
عنده قدره غريبه إنه يفرحك وإنه يزعلك
كل ما الوقت يعدي ممكن أحزانك تهدى وممكن تنسى حاجات كتير مؤلمه..
ولو منتظر حاجه والوقت عمال يمر كل ما يعدي بتتوتر أكتر.. ولو قرب يخلص والحاجه جاتلك بيكون سبب رئيسي لفرحتك !

وأحيانًا الوقت بيكون له يد بصوره قويه في تحديد مشاعرك والتدخل في قرارها
وهنا موضوعنا بقى..

عارفين زي إيه ؟
كل ما تتأخر على حد جرحته.. منتظر منك كلمه أو موقف.. وتتأخر عليه..
حقيقي بتفقد قيمتها ومعناها !

إللي يقولك ( بعد إيه ! )
صَدَقُه
متقُلش عليه ده قلبه أسود.. مبيصفاش !! مبينساش !!

لأ.. الحكايه وما فيها إن أنت إللي نسيت تطيب خاطره !
فرق توقيت..
في كلمه..
في إحساس..
في موقف..
صدقني قادر يتحكم في درجة غلاوتك !

فرق توقيت.. بيبين حاجات كتير

بذمتك لو عندك تسليم مشروع.. بحث.. امتحان.. أي حاجه
ينفع تسلمها بعدها بيومين ؟؟ ولا حتى ساعتين !
كل مجهودك راح..
ليه عايز تيجي على المشاعر ؟؟! فاكرها هتستناك بنفس القدر والرونق ؟؟

هتقولي غلطانه !
الوقت مهم.. علشان النفوس تهدى..
هقولك غلطان
حتى هدوء النفس له توقيته ومهم جدًا وحتى في دينا إداك لحد 3 أيام خصام !
لكن لو عديته وفضلت النفس دي منتظره كتير لدرجة أن الوقت يخلص !
ساعتها حاجه من الاثنين..
يا ترضى بمكانتك الجديده..
يا تبذل المجهود الكاف إللي يشفعلك تأخيرك..

نعم !!
ليه ؟!
إيه كل ده ؟؟
مش كفايه إني جيت ونويت اطيب خاطرك !! فرق توقيت إيه ووجع قلب !!

يا سيدي زعلان ليه.. ولا تضايق نفسك
أطلع فوق ٧ سطور..
قيلالك ( أرضى بمكانتك الجديده )

مش كِبر خالص.. وملحوظه تانيه كل ده ولا له علاقه بعدم العفو او المسامحه بتكلم في مَعزّه في غلاوه..

كل الحكايه إننا متعودناش إن المشاعر الإنسانيه لها أُسس ولها ثمن أغلى من أي شئ آخر..

لكن أحلى ما فيها إنها السهل الممتنع..
بكلمه صادقه بنظره صادقه بإحساس صادق تقدر تدفع ثمن.. فرق التوقيت

(الكلمة لا تؤجل فهي مثل زهور المواسم تذبل اذا خرجت من اوانها.... يسري الفخراني)

#saraosama