البداية (التربية موضوع كبير)

التربية موضوع كبير ومحتاج منك صبر عشان تفهم إن ثماره حتجنيها بعدين لأنه رحلة عايزه صبر وهدوء ولين مننا وأنا عارفه إن ده ممكن يكون صعب أو ضغط على ناس كتير خصوصا مع الضغوطات الحالية لكن لما نقسمهم لشوية مهارات ونتدرب عليها واحدة واحدة ونشوف معاك موقف تربوي بتمر بيه يوميا.. وإزاى تقدر أنت كمربي تحوله لمهارة جديدة يكتسبها أولادك حتلاقي الموضع بدأ يكون ممتع وبدأت تخلى بالك إنه بمجهود بسيط يوميا الموضوع حيتحول 180 درجة إن شاء الله.
... أول حاجة لازم تحاول فيها ودي حتكون على مدارات المقالات إللي جايه كلها إنك تكتب قدامك (نظرتي إيجابية)
يعني إيه الكلام ده؟ يعني عايزين نحول عينك من عين بتشوف الأمور بمفهوم موروث خاطئ وبتضخم الأمور لعين إيجابية بتحاول تركز على المهم والمفيد والحل من الموقف إللى بتمر بيه مع أولادك.. ها جاهزين؟؟ يلا نبتدي..
الموقف: ابنك بيجري وبيلعب وأنت مش مستحمل ده....
انت: متطنطش يا حبيبي براحة يابني... العب في أوضتك.. خلى بالك البتاعة دي حتنكسر.. يووووه أنا قلت إيه بقى.. اسمع الكلام... بقولك بس..
.وهوووووب طراخ.. الإزازة اتكسرت...
أنا مش قلتلك... شفت عملت إيه إنت متسمعش الكلام والله حتشوف... وتلم الإزاز المكسور وإنت عمال تبرطم وتبرطم وتقول امشي من هنا لتتعور.. إنت مفيش منك فايدة وهلم جره من كلام كتييييييييير نتيجة الغضب اللى جواك..
طيب إيه اللى حصل فوق ده.. ببساطة الموقف سيطر عليك إنت وخرجك من شعورك.. وبنظرتك السلبية للموقف خلتك نستنج الآتي: الولد مسمعش الكلام وده حصل نتيجة إنه مسمعش كلامك وإنه غلطان وإنت انفجرت بيه نتيجة لده..
طيب إزاى أحوال ده لنظرة إيجابية في التربية:
· أول حاجة لو أنت شاكك إن في حاجة ممكن تنكسر ممكن تطلب منه يشيلها بهدوء ويحطها في المكان المناسب.. أو تكون أنت مهيأ البيئة اللى حواليه لوجود طفل.. لكن متفضلش على أعصابك إن ممكن حاجة طول الوقت حواليك تنكسر بسبب لعبة...
· تحط في دماغك كويس أوي إن اللعب بحرية وبدون قيد مهم جدا للطفل وإن ده بيخليه يعبر عن نفسه ويطلع مشاعره وبالتالى حتقبل واحدة واحدة فكرة اللعب الحر حواليك.
· قوله كلام إيجابي واعمل معاه اتفاقات أو تديله اختيارات أنت محتاج تلعب في المكان ده ولا ده.. طب تفتكر نعمل إيه عشان تلعب براحتك لأني مشغول دلوقتي ومحتاج هدوء؟؟
· وأخيرا لو حصل مشكلة زي كسر الإزازة ابدأ إنك تعلمه مهارة تصحيح الخطأ فورا بدل اللوم الكتير والعتاب اللى ولا حيودي ولا يجيب غير حرقة دمك وخوفه منك.. الأول تطمن عليه: أنت بخير ؟؟ طيب دلوقتي خلى بالك عشان دي مش منطقة أمان...ولو سنه صغير خليه يجيب جاروف وفرشة يديهملك.. لو سنه أكبر خليه يشيل الإزاز الكبير وانت معاه طبعا.. وبكده أنت بتوصله واحدة واحدة إنه يتحمل المسئولية بدل ما يفضل يجلد في نفسه إنه السبب وإنك مضايق منه ومش طايقه وكم مشاعر سلبية أنت وهو في غنى عنها...
مش بس كده أنت كمان علمته إنه يفكر معاك ويقرر حيعمل إيه عشان يقدر يلعب بعد كده براحته حواليك.
ها قربنا شوية لمفهوم العين الإيجابية؟! أشوفكم المرة الجاية....