hedad
القاهرة : السبت 25 نوفمبر 2017
محمد الباز رئيس مجلسى الإدارة و التحرير
محمد العسيري رئيس التحرير التنفيذي
ads
ads
مرايا الابداع
السبت 11/نوفمبر/2017 - 08:47 م

حاجات مايعملهاش العفاريت

حاجات مايعملهاش العفاريت
مراد ناجح
dostor.org/1622047


فكرة إنك تكتب قصيدة
وأنت ف حالة هذيان
فكرة مغرية لأى شاعر
نفسه يقول كلام كتير مش مضطر
ف أى وقت تانى إنه يقوله
يفضل يلف جوّه الشوارع والزمن
طفل صغير
قادر يعمل حاجات مايعملهاش العفاريت
ويقول كلام يخلّى وش البنات م الخجل يحْمَر
الصوره اللى ع الحيطه دى
كانت ليّه زمان بس مش عارف إمتى ؟!
وأنا أبويا عمره ما اشترالى طيّارة ورق
علشان أطيّرها من إيدى
الليل دايمًا حرامى عبيط
بيكرر نفس الجريمه ف شارعنا
وبيحاول يسرق الشجاعة اللى على وش
خيال المآتة اللى بيطيّر بيها العصافير
ويحقق انتصارات وهميّة لحد النور ما يشقشق
واللى ع القهاوى يروحوا
الأرض بنت الشقا
وأنا ابن راجل فضلت تطارده السنين بالتعب
لحد آخر نفس
الحضن الحقيقى للدفا لما أحلامك تصاحبك
وأنت بتغنى.. بلادى بلادى
لكِ حبى وفؤادى
بس نرقص سوا عصافير ف الكتب
ماشيين ع الخرايط جنود
رافعين راسهم لفوق
وبيحيّوا العلم.

حاجات مايعملهاش العفاريت
ads