الجناينى: سوتس بالعربى أول مسلسل عربى يدخل قائمة توزيع شركة nbcu العالمية

اعلن المنتج طارق الجنايني عن أن شركة nbcu العالمية، اختارت مسلسل "suits بالعربي" ليصبح أول مسلسل ناطق بالعربية من توزيعها وستبدأ وضعه في كتالوجاتها بداية من شهر سبتمبر القادم.

وكتب الجنايني عبر صفحته على موقع التواصل الاجتماعي فيس بوك قائلًا: بوست طويل شوية مع انتهاء الحلقة الرابعة من سوتس بالعربي، الحمدلله في منتهى السعادة بردود الفعل المحبة للمسلسل.. والصراحة عندي كام نقطة كدة كنت عايز أوضحهم من أول ما أعلنت عن تصوير سوتس بالعربي، بس كنت خايف تتفهم غلط.. بس النهاردة بعد ما الحمد لله المسلسل أثبت نجاحه والناس بتشيد بيه في العالم العربي كله، أقدر بقى أوضح براحتي.. 

1- كل صناع سوتس بالعربي من عشاق النسخة الأمريكي، اللي على فكرة تكلفة الحلقة الواحدة منها بأكثر من تكلفة الـ30 حلقة عندنا.. وكلنا فاهمين من الأول أنك تعمل adaptation لمسلسل معروف ومحبوب زي سوتس مش هتكون خطوة سهلة خالص والـdie hard fans اللي إحنا أصلًا منهم مش هيتقبلوها بسهولة..

2 - اللي اتفرج على سوتس الأمريكي في العالم العربي ما بين مليون لاثنين مليون بالكتير.. بس العالم العربي حوالي ٣٥٠ مليون، يعني في ٣٤٨ مليون عربي ماتفرجوش على النسخة الأمريكي لسبب أو لآخر و دول الحمدلله معظم اللي اتفرج منهم على النسخة العربي معجبين جدًا بكل تفاصيل المسلسل..

3- علشان أنت شاري فورمات ودافع فلوسه ومعاك حقوقه، فهما كمان عندهم حقوق أنك ماتبوظش شغلهم وتفتي من دماغك، علشان كدة لازم يكون تغييرات السيناريو في أضيق الحدود وبموافقتهم، بما فيها الاسم اللي بيعامل معاملة البراند..

و ده اللي حصل مع الأمريكان نفسهم لما اشتروا حقوق the office مثلًا من إنجلترا وأمثلة تانية كتيرة في التليفزيون والسينما..

4- الناس اللي بتتعامل على أن هارڤي ومايك ودونا ولويس وچسيكا وراتشيل ولاد خالتهم أو من الرسل اللي حرام يجسدوا على الشاشات العربية، أحب أوضحلهم أن الـcreators بتوع سوتس الأمريكي منبهرين باللي إحنا عاملينه وحابين الكاست بتاعنا جدًا وشايفين أن ديكورنا وصورتنا أحلى من بتاعتهم وده عندي في إيميل موثق منهم..

5- طبيعي أنك تتفرج على الحلقة الأولى وتحس أن المسلسل ده مش ليك فتعبر عن رأيك وده حقك تمامًا بس غريبة شوية أن حضرتك  لسة بتتفرج لغاية الحلقة الرابعة علشان تكتب بعد كل حلقة أن الأمريكي أحلى برضه، أنا حاسس أنك اتعودت علينا بس خايف تعترف. 

6- الأهم بقى من كل اللي فات ده و السبب الرئيسي لكتابة البوست ده، أن بعد مشاهدتهم لأول 10حلقات، تم الاتفاق مع NBCU أن النسخة العربية من سوتس دلوقتي داخلة الكتالوج الرسمي بتاع NBCU وهتبتدي تتوزع للعالم كله من شهر سبتمبر.. 

ويشارك في بطولة المسلسل النجوم آسر ياسين، أحمد داود، صبا مبارك، ريم مصطفى، محمد شاهين وتارا عماد ويخرجه عصام عبدالحميد ويكتبه محمد حفظي وياسر عبدالمجيد.