ولما كانت الحلقة الرابعة
فتحى عبدالوهاب باعتباره «رشاد الحرامى» فى «سوق الكانتو» خطط لسرقة بيت أمير كرارة.. واتفق باعتباره «الدكتور وحيد» فى «الكتيبة ١٠١» مع الجماعات التكفيرية إنه يشتغل معاهم ويهرب لهم السلاح.
١٠٠٠ حمد الله ع السلامة.. أضاع المخرج فرصة ذهبية باختفاء مايان السيد.. كانت فرصة تختفى وتظهر فى آخر مشهد فى رمضان، وهنعتبره سسبنس.
محمد رمضان «جعفر العمدة» لقى ابنه المخطوف.. ومى عمر راحت لشقة محمود فارس فى «علاقة مشروعة».. أما مايان السيد التايهة فى «١٠٠٠ حمد الله ع السلامة» فراحت لعنبة بيته ولبست الجلابية.. فى رمضان.
فى مسلسل «ضرب نار» ماجد المصرى «زيدان» جند سحر صاحبة ياسمين عبدالعزيز «مهرة» علشان يعرف عنها كل حاجة، ويتقرب منها بعد ما راح لها البيت فى الحلقة التالتة، وعرض عليها الجواز وهى رفضت.. أما «عمر الشناوى» فى «مذكرات زوج » فراح لسارة الشامى مكان شغلها علشان يقولها بحبك، بعد ما قصة إنه يجند صاحبتها ما جابتش نتيجة.
أحمد عبدالعزيز فى «سره الباتع» لمح لحنان مطاوع إنه عايز يتجوزها، فضربت ضحكة ضيعت فيها مستقبله.. وأحمد عيد فى «عملة نادرة» اترفض من نيللى كريم، فانفعل وقال: «اللى ترفض مسعود تتحمل ناره».
«مذكرات زوج».. طارق لطفى قابل حبيبته الأولى، وياسر جلال فى «علاقة مشروعة» حكى للسواق بتاعه قصة جوازه من مى عمر.
خالد الصاوى ضرب طليق زوجته.. وأحمد العوضى ما ضربش حد.. لكن محمد رمضان عجن نسيبه فى الشارع.
علاقة إيمان العاصى بزوجها محمد رمضان تحتاج إلى كونسلتو من خيرة أطباء مصر النفسيين لمعرفة كيف تعيش امرأة مع رجل قتل شقيقها، وحبس شقيقها الآخر، وكاد يقتل الثالث لولا تدخلها: «بلاش تموته يا جعفر، قتلتلى واحد قبل كده، مش لازم يكونوا اتنين»، فيبص لها ويقرر يسيبه.
أداء إيمان العاصى حتى الآن هو الأفضل بين زوجات جعفر الأربع، وحتى الآن هالة صدقى متألقة.
إذا أرادت روبى أن تستمر فى تقديم الاستعراضات فى أغانيها، سواء فى الحفلات أو الإعلانات، عليها أن تتابع مع مدرب أصوات، أو طبيب تغذية يضبط وزنها الزائد، أو صديق مخلص يفهمها إن لا لياقتها ولا وزنها يسمحولها بالرقص.
