«الجاكت بتاعك حريمى يا فنان».. شذى لـ حسن شاكوش: «إنت جاهل ومستفز وصوتك مزعج.. متعملش فيها بيتهوفن»
ردت الفنانة شذى على تصريحات مطرب المهرجانات حسن شاكوش عنها، خلال حواره مع الإعلامية بسمة وهبة، وذلك عبر حسابها الشخصي بموقع التواصل الاجتماعي «فيسبوك».
وكتبت شذى في منشور لها: «طب إنت مستفز يا شكشك بدل كلمة مستفز بتعصبك، ودكتورة بسمة وهبة علشان هي ست شيك قالتلك شذى فنانة زميلة علشان تجبر بخاطرك، بس الحقيقة إنت لا فنان ولا زميل بالنسبالي خالص، إنت مؤدي وبالنسبالي صوتك مزعج، إنما فنان زميل دي أنا أعترض عليها بشدة، ودي الحقيقة، بس علشان دكتورة بسمة مؤدبة وانت ضيفها مقلتلكش الحقيقة».
وتابعت شذى: «وأصلا مينفعش تسأل مين دي، مش علشان لازم تكون عارفني بيني وبينك أريح لو متعرفنيش وتعمل الشويتين بتوع ااااااه عارف اسمها ومش عارف أغانيها ومال شكلها اتغير كده ليه وجو ٣ ورقات ده، لأن الرد موجود، ما أنا لو محدش فاكرني ولا عرفني مش هيجيبوا كلامي ويعرضهولك يا جاهل».
وأضافت: «أصلا أسماء الأغاني اللي إنت قولتها دي تتكتب على تكاتك، متعملش فيها بيتهوفن والنبي، ومش معنى إن في هيصة الفترة دي على اللون ده إن انت واللي زيك صناع المزيكا في مصر، أبدا والله انتوا فاضحنا في العالم كله برداءة المزيكا اللي بتقدموها».
وعقبت كاتبة: «وعموما وعمليا ردك ملهوش دعوه خالص بالسؤال، ولا فهمت منك حاجه، ومش عيب إنك تحضر قبل الحلقة عفوي وعلى طبيعتك دي لما تكون قاعد على مصطبة أو واثق في ردودك الذكية المنطقية اللي هي مش موجودة أصلا، فإبقى حضر بعد إذنك علشان بتدوخ المذيعين معاك.. ملحوظة الجاكت اللي كنت لابسة حريمي يا فنان».
ورد مغني المهرجانات حسن شاكوش على الفنانة شذى بعدما انتقدته وقالت إنه لا يجيد الحديث، قائلا: «هي بتغني؟! هي دي مغنية؟! بتغني إيه؟! معرفهاش والله العظيم، أنتِ حافظة لها أغاني؟!».
