رئيس مجلسى الإدارة والتحرير
محمد الباز
رئيس مجلسى الإدارة والتحرير
محمد الباز

أول مونديال للأندية

السير توماس ليبتون، اللي هو الحاج ليبتون بتاع الشاي، كان رجل أعمال إسكتلندي، وتقدر تعتبره أول واحد فكر في كاس العالم لـ الأندية، كنا في بدايات القرن العشرين، فـ ساعتها كاس العالم لـ الأندية كان يعني إنه كام نادي أوروبي يلعبوا سوا، هو دا كان "العالم" وقتها بـ النسبة لهم.
الأمريكتين بعييييد، ما تحلمش، إفريقيا وآسيا دي مش دول، أساسًا هي تحت الاحتلال الأوروبي، فـ مش داخلين في الاعتبار، لكن حتى دي إنك تلم كام فريق من أوروبا كانت حاجة صعبة، محتاجة تكاليف كتير، وممكن ما يكونش ليها عائد، كان فيه احتراف، بس كله في الحدود، والأوليمبياد كانت بـ تتلعب بـ الهواة بس.
أخونا ليبتون دا قرر تمويل المغامرة بعد مفاوضات ومداولات وسفر ومرواح ومجي، قدر يقنع أربع أندية: تورينو ويوفنتوس من إيطاليا، ونادي من سويسرا اسمه ونترثور، ونادي من ألمانيا اسمه شتوتجارتر، مش متأكد إذا كان هو شتوتجارت ولا لأ، هو مكتوب شتوتجارتر. 
بس يوفنتوس وتورينو الاتنين من إيطاليا، وإحنا عايزين نادي من كل دولة، دي كاس عالم برضه، فـ قررو إن تورينو ويوفنتوس ينضموا في فريق واحد، كدا ناقصنا فريق رابع، ونقدر نعمل بطولة.
كلموا الاتحاد الإنجليزي، لكن الإنجليز زي ما قلت لك قبل سابق، كانوا دايمًا شايفين إن العالم متطفل عليهم في حكاية الكورة دي، هم أصل الكورة، فـ كان فكرة العمل المشترك معاها مش موجودة، زي ما قلت لك إنها ما اعترفتش بـ الفيفا أول ما اتكونت، ولما اعترفوا كان ليهم شروط، منها إنهم يحطوا هم قوانين كرة القدم، ودا اللي حاصل لـ حد دلوقتي.
ما علينا، الإنجليز ما رضيوش يشتركوا، فـ أخونا ليبتون لف ودار، وراح مكلم نادي إنجليزي لـ الهواة غير خاضع لـ سيطرة الاتحاد الإنجليزي، اسمه نادي ويست أوكلاند، من مقاطعة دورهام شمال شرق إنجلترا، قدر يقنعهم يبقوا النادي الرابع.
وهكذا في 1909، تورينو – إيطاليا، ظهرت أول كاس عالم لـ الأندية، ودي بطولة رسمية، نتايجها مسجلة في الفيفا بـ اعتبارها "كاس عالم" مش أوروبي بس.
المهم، اتلعبت البطولة قبل نهائي، والخسران مع الخسران ع التالت والرابع، والفايز مع الفايز على البطولة، وكسبها ويست أوكلاند بتاع الهواة، لما غلب النادي السويسري في النهائي 2/1
اتفقوا تبقى النسخة التانية 1911، في النسخة التانية، النادي السويسري ما جاش، فـ قدروا يتفقوا مع نادي سويسري بديلهو إف سي زيورخ.
النادي الألماني ما جاش، وما قدروش يجيبوا حد مكانه، فـ اضطروا يفكوا التحالف بين تورينو ويوفنتوس، وبقى كل نادي لـ حاله.
اتلعبت البطولة بـ نفس النظام، وبرضه كسبه ويست أوكلاند بعد ما داس على يوفنتوس 6/1، فـ إدوا الكاس لـ ويست أوكلاند يحتفظ بيه لـ الأبد. 
رغم إن كل نسخة كانت أربع مباريات، بين أربع أندية، إنما كانت مكلفة، ومفيش منها مردودات كبيرة، فـ خلاص، توقفت بعد نسختها التانية.
وفضل الكاس بتاعها في خزينة النادي اللي كسبها، لـ حد ما جه مواطن شريف، قدر ياخد الكاس هو من خزينة النادي، خده إزاي؟ سرقه طبعًا سنة 1994، وفضل البوليس متابع لـ فترة طويلة، إنه يظهر، أو يقدروا يلقطوه وهو بـ يتباع، ما أمكنش الوصول لـ حاجة، ومن ساعتها، محدش شاف الكاس.