رئيس مجلسى الإدارة والتحرير
محمد الباز
رئيس مجلسى الإدارة والتحرير
محمد الباز

البروفيسور فيريرا

طبعا طبعا فيريرا مدير فني عبقري، بروفيسور، داهية، ما جابتوش جيابة، عشان هو السبب في إنه الأهلي يتعادل مع المقاولين والبنك الأهلي والجونة وطلائع الجيش وسيراميكاويخسر من سموحة والمصري، اللي هم دول 16 نقطة لو الأهلي كسب نصهم كانوا زمانه حسم الدوري.
مش هـ نتكلم عن نقاط أخرى خسرها الأهلي زي الهزيمة من بيراميدز والتعادل مع فيوتشر والزمالك نفسه، لـ إنه دي نقاط وارد يخسرها، إنما الماتشات المذكورة أعلاه، الطبيعي الطبيعي، لو الأهلي سيئ، يكسب 75% من نقاطها.
ما أراه بـ وضوح، وبح صوتي به من سنوات، إنه في المنافسات المصرية والإفريقية، كل عناصر اللعبة شبه بعضها: مديرين فنيين أو لاعبين، أجانب أو مصريين: فيريرا زي موسيماني زي سواريز زي جوزيه، زي علي ماهر زي حسام حسن زي إيهاب جلال، وحتى علاء عبد العال والله ما يفرقش عنهم كتير.
زيزو زي أفشة زي عماد ميهوب بتاع الشرقية لـ الدخان، ومصطفى سعد لاعب سيراميكا ومصطفى شلبي جناح إنبي، كلهم شبه بعض.
في الدوري الإنجليزي مثلا كل اللاعبين والمديرين الفنيين عندهم الأساسيات متوافرة، الأساسيات يعني الحاجات الأبجدية في كرة القدم: التسليم والتسلم والتسديد والعرضيات وضربات الرأس، وتنفيذ الركنيات، ورص الدفاع، الحاجات دي بـ تحصل بـ شكل طبيعي.
بـ التالي، اللي بـ يفرق هناك هو الأمور الفنية المحضة والدقيقة، وكواليتي اللاعبين فنيا وبدنيا وذهنيا، وأفكار المديرين الفنيين المبتكرة، وتغيير فذ يقلب الماتش ووووو.
إنما هنا إنك توصل لـ درجة أداء الأساسيات والأبجديات دا محتاج شغل كتير. الأمر هنا لا يتوقف على الكواليتي إنما على الانضباط، الانضباط، فقط الانضباط. يعني إنه منظومة النادي تبقى متماسكة، وعارفة كوعها من بوعها، وقادرة إنها تخلي أفراد هذه المنظومة تشتغل، وتوصل لـ أفضل مردود ممكن من اللي عندها.
دا اللي كان بـ يميز الأهلي طول الوقت، من هنا جات مقولة زي "الأهلي بـ من حضر"، اللي الناس فهمتها على إنها تعني: أي حداشر شبح هـ يلبسوا التي شيرت الأحمر هـ يكسبوا، بينما المعنى هنا كما أفهمه، إنه المنظومة القوية قادرة على استنفار إمكانيات أي عنصر، ولا تتأثر بـ فقدان أي عنصر.
هل دا حاصل دلوقتي؟
الإجابة: زي ما حضرتك شايف، وخليني أبدأ بـ الزمالك بـ اعتباره المتصدر.
الراجل فيريرا لما جه، أول كام ماتش كانت الناس بـ تتداول مقاطع من ماتشات الزمالك، على سبيل السخرية، لكن الإدارة هنا وفرت له الحماية والاستقرار، الحماية مش يعني تسكت الناس، ولا ترفع عليهم قواضي، إنما تعزله عن دا، إنت اشتغل ومالكش دعوة، وأنا مش هـ أحاسبك بناء على تقييمهم.
فيريرا اتغلب من إنبي وطلائع الجيش واتعادل مع فاركو، ودول 8 نقاط في مباريات قليلة، كانت كفيلة بـ إبعاده عن المنافسة، إنما هو وجهازه ولاعبيه مكملين مستقرين، حتى الماتشات اللي كسبها، بعضها كان الأداء سيئا، إنما الاستمرار والاستقرار "والانضباط"، يخلي النسق مع الوقت يرتفع تلقائيا.
من أهم معالم الانضباط الواقعية، دي قايمتنا يا جماعة، وهم دول اللاعيبة اللي عندنا فـ وزعهم على ماتشاتك بـ معرفتك، ومحدش هـ يقول لك تلت التلاتة كام.
بـ التالي، بقى عندك إنت، كـ مدير فني، فرصة. فرصة إنك تعمل شغلك، شغلك اللي هو الشغل العادي خالص، بس بـ يتعمل.
هل الشغل دا كافي لـ الفوز بت المسابقة؟
والله، حسب حالة المنافس، لو المنافس (الأهلي) منضبط زيك، يعني إنتو الاتنين بـ نفس القدر، مش هـ يكون شغلك كافي، لـ إن قايمة المنافس أكثر اكتمالا، لـ اعتبار العدد مش الجودة (يعني الاهلي لاعيبته أكتر مش أحسن) فـ إنت هـ تخسر نقاط وهو يخسر أقل، فـ هو يكسب.
إنما المنافس داإدارته مش عارفة حاجة في أي حاجة، مش عارفة إحنا بـ نواجه إيه دلوقتي، عندك كام مباراة السيزون دا؟كام مسابقة؟طب إيه له الأولوية؟طب هـ نوزع اللاعبين ع المنافسات دي إزاي؟
مفيش الكلام دا، الإدارة بـ تجيب مدير فني ولاعبين، وتقول لهم: لازم تكسبوا كل الماتشات وكل المسابقات، وبـ إسكور كبير عشان محدش ياكل وشنا، وتسيبهم ياكلوا في بعض، وكمان منهم لـ الجماهير (اللي أغلبهم همج رعاع بـ طبيعة الجماهير عموما) فـ تبقاش عارف مين فين؟
يا راجل!
يا راجل!
فيه فريق في الدنيا كل شوية يبدأ الماتش بـ إصابتين عضليتين، في أول عشر دقايق؟
فيه كدا؟
فيه فريق في الدنيا، كل نص ساعة: انتهاء موسم محمد شريف، انتهاء موسم عمرو السولية، انتهاء موسم أحمد عبد القادر، انتهاء موسم عبد السلام أمين، فيه كدا؟
أنا ما جبتش سيرة حسين الشحات لـ إنها إصابة مختلفة.
طب قول لي ملامح تشكيل الأهلي كدا، أنا ممكن أقول لك الشرقية لـ الدخان بـ تلعب إزاي وبـ مين، وبـ تعمل التبديل الفلاني في الدقيقة العلانية، مش هـ أقول لك سيراميكا وفاركو وفيوتشر، لـ إنه دول متماسكين عن الأهلي بـ مراحل.
الزمالك مثلا عنده لاعب اسمه سيد محمد (نيمار) والأهلي عنده زياد طارق، كل واحد منهم أول موسم ليه، هل فيه فرق بينهم؟نوهائي
لكن في الزمالك معروف سيد بـ يلعب في مركز إيه، دوره إيه، وبـ يلعب كام دقيقة (لـ إنه بدنيا مش جاهز لـ 90) ولما بـ يخرج بـ ينزل مكانه مين؟ إمتى؟
أول تلات ماتشات شارك فيها سيد، الزمالك خسر خمس نقاط من أصل تسعة، والأربع نقاط اللي كسبهم تلاتة كانوا من الشرقية لـ الدخان، لكن محدش قيمه بناء على دا، ولو حد قيمه مش مهم، كمل وهـ تظبط معاك.
زياد طارق إنت بقى ما تعرفش هو بـ يشارك إمتى؟ دوره إيه في الملعب؟بـ يسند على مين يعوض نقص خبرته؟بـ يشارك أساسي ولا بديل؟ مجهزه ذهنيا لـ المشاركة ولا نزلته مضطر لـ إنه الأساسي أصيب إصابة من إياهم.
وبعدين، الجماهير طول الوقت غضبانة، وبـ تشتم المدير الفني واللاعبين (أي مدير فني وأي لاعبين)
يا راجل!
يا راجل! 
دا موسيماني كسب الزمالك خمسة تلاتة، فـ اتقطع لما ورم، كسب مونتيري المكسيكي بطل أمريكا الشمالية، وكان الأهلي بـ الصف التاني ولا التالت، فـ اتقال له فرقة فاضية، والإدارة سابته لـ كلاب السكك تنهش فيه، بل إنها شاركت في النهش، وأنا مش بـ أقول إنه متميز وعبقري، لأ، زيه زي غيره، بس سيبه يشتغل، ووفر له "المنظومة"، ا ل م ن ظ و م ة!
بـ اختصار علشان ما أطولش عليك، في مصر الأقل انضباطا يخسر، مش الأكثر كفاءة يكسب، والزمالك قدم هذا الموسم نموذجا فريدا في الانضباط، بينما الأهلي قدم منظومة في منتهى البزرميط، فـ اللي انتصر فعليا هو مرتضى منصور، والخاسر هو محمود الخطيب.
مبروك وهارد لك!