مكنتش مديه خوانة!
عشان بقالنا سنين بنسمع أو بتحصل قدامنا قصص قاسية كتير على الستات اللي بتتظلم في جوازها ومتعرفش تاخد حقها أو تقعد تضيع سنين من عمرها في المحاكم، سواء كانت لوحدها أو معاها أطفال.
وعشان زي ما في ناس بتعرف تتلاعب بالقانون وتظلم بيه.. بيتلاعبوا بالشرع بردوا وبيظلموا بيه.
ولحد ما يكون القانون خالي من ثغراته ولحد ما نوصل ليوم الحساب اللي كلنا هنقف فيه قدام ربنا ونتحاسب بالعدل.
ضروري جدا البنات والستات تحاول تضمن حقها وتتعلم من التجارب اللي بنسمعها.
أكتر جملة بتسمعيها إيه في كل قصة ست اتظلمت؟ "أنا مكنتش مدية خوانة خالص"
فمن أجل حياة سعيدة وهادية حرصي على حياتك من أي محاولة خداع.
اعرفي إن النفوس بتتغير وإن الشيطان شاطر، فمهما كنتي واثقة في اللي قدامك.. حرصي من أي يوم هيتغير عليكي فيه.
وفي نفس الوقت خليكي مركزة كويس قبل ما تتجوزي.. بيبقي في علامات في الشخص اللي قدامك للأسف بنات كتير بتتغاضي عنها وتقول ده عيب صغير أو أنا هغيره بعد الجواز.
فاعرفي إن رقم واحد محدش بيتغير بعد الجواز إلا قلة قليلة جدًا، ده بالعكس اللي بيبقى باين في البدايات ده بيكون أفضل نسخة والراجل بيحاول يظهر أفضل ما عنده .. فلما تظهر أي علامة سلبية اأقفي عندها وفكري فيها كويس قبل ما تكملي.
اعرفي أنك غالية وست الستات.. اوعي تسمحي لحد أو تسمحي للمجتمع إنه يقلل منك.
اوعي تقولي أنا شكلي وحش فهقبل بقليلي عشان محدش هيبصلي أو فرصي قليلة.
اوعي تقولي أنا مطلقة مرة أو مرتين أو أرملة فلازم أتجوز أي حد عشان أنا معنديش فرص.
اوعي تلاقي أي مبرر يهز ثقتك في نفسك فتتنازلي عن حقوقك أو تقبلي بأي جوازة والسلام.
انتي ست الستات وفيكي مميزات وحقك إنك تكوني في علاقة تكوني فيها ملكة متوجة مهما كانت ظروفك.
مش معنى إنك مطلقة يبقي مش هتتجوزي إلا مطلق أو أرمل أو تقبلي إنك تكوني زوجة تانية.
في ستات كتير اتجوزوا للمرة التانية براجل متجوزش قبل كده أو مطلق وراعى ربنا في طليقته، في رجالة كويسة ومحترمة كتير ومعندهمش الأفكار المكلكعة دي .. فمتروحيش برجليكي للنوعية إياها وتقولي نصيبي!
حياتك مش مرهونة بالجواز ولا قيمتك مرهونة بالجواز.. فمتستعجليش أبدا
العقد شريعة المتعاقدين.. مش تخوين أبدًا ده حقك إن أي اتفاق بينكم يتكتب في عقد الجواز.
أي جمل من نوعية انتي بتخونيني.. أو أنا مقبلش إن حد يتشرط عليا أو إني محبش أمضي على حاجة ممكن تسجني بعدين.. أو انتي كده بتخلي نفسك بيعة وشروة، تهربي فورا ومتتناقشيش.
يوم ما تقابلي شخص عرض عليكي الجواز.. زي ما بتتعرفي عليه وتشوفي شخصيته وميوله ومبادئه.. اتاكدي إن كل ده صح.
سواء انتي أو أهلك، بتسألي عليه في منطقته وشغله وصحابه وجيرانه عشان تتطمني إنه صادق وإن اللي بيقوله وبيظهر منه حقيقي.
اتكلمي معاه في كل شئون حياتكم المستقبلية.. وحطوا اتفاقات واضحة واكتبيها في عقد الزواج.. اتفقتوا إنك تكملي تعليم أو شغل اكتبيها.. اتفقتي إنه ميتجوزش عليكي اكتبيها
اتفقوا على الأدوار بينكم هتكون إيه.. واسمعي منه مفهوم الأسرة بالنسبة له إيه، إيه دور الزوج والأب اللي هيقدمه.
اوعي تسيبي نفسك لوهم البديهيات.. اقعدي فكري في شكل حياتك واسمعي منه شكل حياته واتاكدوا هو في توافق ولا لا.
أي اتفاقات مادية اكتبيها ووثقيها.. واسمعي كلام أهلك.
كام مرة سمعتي جملة يا ريتني سمعت كلام أهلي؟
بنات كتير ندمت لما وقفت قدام أهلها عشان تتجوز شخص هما رافضينه إلا قلة قليلة.. بس في الأغلب الأهل بيكونوا ليهم خبرة حياتية أكبر منك.. ومن كتر حبهم ليكي فإحساسهم كمان بيكون كبير، فبيحسوا ناحية أي شخص ممكن ياذيكي أو مش هيراعي ربنا فيكي.
متقبليش بالإهانة.. متقبليش بالذل.. متقبليش بتنازلات عشان للأسف إحنا في زمن محدش بيعمل لحد حساب هو مش عامل لنفسه حساب.
وآخر حاجة لما تقابلي راجل متجوز يقولك إنه ضحية وإنه عايش مش مبسوط ومكمل عشان العيال، أو متجوز واحدة لأي مصلحة.. أو متجوز مغصوب من أهله، أو أي سبب عشان يقولك انتي الأولي والأخيرة وإنه هيموت من غيرك اوعي تصدقيه مهما كان باين عليه إنه صادق وبرئ .. للأسف الأسطوانة دي بتخدع بنات كتير وبسببها بيتخرب بيتهم وبيت ستات غيرهم.
متتجوزيش في السر لأي سبب هتخسري في الآخر!
ومتصدقيش إن مراته قابلة بالتعدد من غير ما تكلميها، زي ما أنت عرفتي وقبلتي هي كمان من حقها تعرف وتقبل أو ترفض.
قالك إحنا متفقين على الطلاق بس مسألة وقت، استني لما يطلق ومتدخليش نفسك في مشاكل انتي في غنى عنها.
دوري وشوفي هو بيراعي ربنا في ولاده ولا لا.
اللي ميتجوزكيش قدام الناس كلها ويحارب علشانك ويتعب عشان جوازكم يكمل ويقدم أعلي ما في استطاعته عشان يكون في جواز سليم مستقر ويراعي حقوقك من غير عجرفة أو مشاكل... اهربي!
انتي في غنى عن كل ده.. انتي قيمتك كبيرة زوي متقللهاش.
