رئيس مجلسى الإدارة والتحرير
محمد الباز
رئيس مجلسى الإدارة والتحرير
محمد الباز

امسك ريد فلاج

الريد فلاجز أو علامات الخطر اللي بتحصل في أي علاقة وفي الأغلب بيتم تجاهلها عشان بتبان بعد ما بتغرز بشوية فبتقولي لنفسك يمكن بيهزر، يمكن فهمت غلط ... يمكن أقدر أغيره بطريقتي.

طب ليه من الأول ما نفتحش الصندوق الأسود وندور إحنا علي العلامات قبل مانتدبس ونقرر نرتبط؟

مهم أوي في بداية التعارف ولو حصل كلام بشكل مباشر عن ارتباط بهدف الجواز أو حتى في مرحلة التلميحات .. إننا نسأل بعض أسئلة واضحة وصريحة عن كل مبادئنا إللي بتأثر بشكل واضح في حياتنا، وبلاش فكرة المسلمات أن تبقي فاكر إن اللي أنت أو أنتي مؤمنة بيه ده شيء بديهي كلنا اتربينا عليه.

ده مش صحيح بالمرة كل واحد ليه مبادئه ومسلماته حتي لو كان اتربى علي العكس أو نشأته ومجتمعه بيقولوا غير كده.

في فيلم احكي ياشهر زاد مشهد ممكن البعض يشوفه كوميدي لكن في رأيي ده مشهد مهم جداً، وبيوضح أن في حاجات كتير ممكن تظهر وقت التعارف بس لو أدرنا المقابلات صح.

الرائعة سوسن بدر والراحل حسين الإمام لما كانوا في أول مقابلة تعارف في جواز صالونات وسألوا بعض في أمور حياتية ودقيقة وكل طرف فاكر إنها شيء بديهي للكل واختلفوا في الآخر. هو بيجسد الراجل الشرقي الذكوري جداً، وهي الست اللي عايزه تعيش بابسط حقوقها كإنسانة حرة.

فعشان كده ضروري جداً نسأل كل الأسئلة الحياتية بما فيها البديهيات.

من أول توزيع الأدوار في البيت، أنت شايف الست دورها ايه؟ والراجل دوره إيه؟ 

الأعمال المنزلية مسئولية مشتركة ولا مسئولية الست لوحدها؟ 

مصاريف البيت مسئولية الراجل لوحده ولا مسئولية مشتركة لو الست بتشتغل؟ 

وإيه رأيك في شغلي ومواعيدي وعلاقتي بزمايلي في الشغل.. في حاجة ناوي تغيرها؟ وهل أنتي قابلة بالتغيير ده ولا لا؟

استايل لبسي عاجبك؟ ولو اتجوزنا هيفضل ده نفس رأيك ولا ممكن تغيره وتقول عاجبني بس مقبلش إن مراتي تلبس كده؟

علاقتك بأهلك إيه؟ هل أنت مستقل عنهم ولا بتاخد رأيهم في كل حاجة؟ وده هيأثر علينا بعد الجواز ولا لا، والكلام للطرفين ويحصل نقاش عن الحدود اللي هتتحط.

الارتباط بيخليكوا كيان واحد عارفين عن بعض تفاصيلكم وبتشاركوها سوا ولا في حد عنده حدود في النقطة دي.

إيه مفهوم الخيانة؟ والتعدد بالنسبة لك إيه وأنتي تقبلي بيه ولا لأ؟

بتتعصب؟ وإيه اللي بيعصبك؟ وبتعمل إيه وقتها ؟ عمرك ضربت حد؟ إيه رأيك في الراجل إللي بيضرب مراته؟

خروجاتك شكلها إيه؟ صحابك؟ متعود تخرج وقت قد إيه، وبعد الجواز ده مناسب للطرفين ولا في حد عنده مشكلة، وهو كراجل عنده مشاكل مع صحابك أو خروجاتك.

القرارات في البيت هتتاخد إزاي؟ بشكل منفرد ولا مشترك.

لو تعبت هتيجي معايا عند الدكتور؟ ولا هتقولي خدي حد يروح معاكي؟

هنحدد وقت للخلفة ولا زي ما ربنا يريد؟ وعايزين نجيب كام طفل؟ وهنربيهم إزاي؟

أسئلة ومواقف عن الماديات يبان منها اللي قدامك بخيل أو كريم أو حريص.

أسئلة دينية يبان منها هل إحنا علي وفاق؟ ولا كل واحد بيفسر الدين علي مزاجه؟

لغة الحب بالنسبة لكل طرف إيه؟ وهل إحنا مستعدين نقدم ده للتاني؟

يعني مثلا لو طرف بيحب يسمع كلام حلو كتير والطرف التاني مبيعرفش يقول كلام حلو وممكن كمان يكون شايفه تفاهة.. شخص بيحب الاهتمام والتواجد طول الوقت، والطرف التاني مشغول وشايف إن الاهتمام بيجيي وقت الأزمات وبس.

كل ده ممكن يخلق توافق وممكن يخلق اختلاف من البداية يخلينا مننجرفش بمشاعرنا ولا بطاقتنا من الأول، حتي لو يبان إن اللي قدامك شخص محترم ولذيذ ويجيي منه .. الدخول في التفاصيل من البداية هيوفر عليك تدخل علاقة مش مناسبة ليك أو الأسوأ إن كل ده ميظهرش بشكل كافي قبل الجواز وتحصل كارثة بعده.

البدايات جميلة جدا ومليانة مشاعر فياضة وشغف للخروجات والهزار، لكن وقت الدخول في الجد الموضوع بيختلف بس بعد ما مشاعرك بتكون اتحركت أو تكونوا اتجوزتوا، وقرار الطلاق مبيكونش سهل أبدا وفي خسائر ممكن تحصل في الخلافات لما الشخص اللي قدامك تظهر عيوبه.

ومحدش قد جملة أنا أسف مش أنت الشخص اللي أنا عايزه بعد علاقة طويلة ومرهقة.

فممكن نحط في اعتبارنا ندخل في التفاصيل علطول بكل الأسئلة اللي ممكن تيجي علي بالنا ونستفيد من خبرات الآخرين، ونسأل علي الريد فلاجز بنفسنا منستناش إنها تظهر.

ووارد جداً يكون الشخص اللي قدامك بيكدب أو بيجمل نفسه في الأسئلة بس ساعتها حاجة من اتنين.. يا هيبان وهتحس إن اللي قدامك بيتكلم كلام من بره غير اللي جوه وفي غموض وحاجة مش مريحة أو ممكن يرد في حاجات بهزار فمن فضلك اسأل سؤال بشكل مباشر ده بجد ولا هزار عشان في ناس بتعمل كده فاللي قدامها يفتكر إنه هزار، ولما يتصدم فيقوله منا قايلك من الأول وأنت اللي افتكرتنيبهزر "دي مشكلتك مش مشكلتي".. أو ممكن تصدقه فعلاً وبعدين تظهر حقيقته بس هتحمي نفسك من جملة أنتي مقلتيش أنتي مش موافقة علي ده.. لا ده احنا متفقين من الأول وحضرتك اللي خدعتني، وساعتها تقدري تاخدي الإجراءات اللي تأمنك وتلاقي دعم من اللي حواليكي.

خليكم واضحين من الأول من أجل علاقات سعيدة ومريحة.