راهنت على تحمل الشعب.. أبرز تصريحات الرئيس السيسي عن مواجهة الفقر

شهد الرئيس عبد الفتاح السيسي اليوم جلسة بعنوان: “تجارب تنموية لمواجهة الفقر”، ضمن فعاليات منتدى شباب العالم، وقال خلال الجلسة إن حجم الإنفاق الذي قامت به مصر للخروج من متاهة الفقر كان أكثر من 7 تريليون جنيه أي 400 مليار دولار.

إعانة ولا فرصة عمل؟

قال الرئيس السيسي خلال الجلسة إن “مصر دولة شابة، والعاملون بها يقدرون بعشرات الملايين لو توقفوا هيبقى نصف دخلها منين.. الدولة هتكون غير قادرة على إعطاء هذا العدد أموال وإعانات يبقى أديك إعانة ولا منحة وفلوس ولا أوفر لك فرصة عمل؟ احنا اخترنا العمل”.

وأوضح أن هذا الاختيار سيحافظ على تدفق الأموال، وستتقدم الدولة المصرية بمعدلات كان المفروض لن تحدث إلا إذا توقف كل شيء حتى الانتهاء من مرحلة الجائحة، ثم التحرك، وأضاف: “احنا قولنا لا هنتحرك في العمل ونخفف من آثار الجائحة اقتصاديا، ونتعامل بانضباط شديد مع الإجراءات الصحية المطلوبة، ولو احتجنا نعمل إغلاق مؤقت هنعمل وده اللى تم”.

راهنت على تحمل الشعب للإصلاح الاقتصادى رغم تخوف الحكومة:

قال الرئيس السيسي، إن التواصل مستمر بين الحكومة المصرية والشعب، ولن يكون هناك إخفاء أي شئ من الحقائق، “مش بنخبي حاجة وبنقول للناس كل حاجة، ولما جينا نعمل الإصلاح الاقتصادي اتقال ده إجراء يتم التحسب منه كثيرا، وكنا خايفين من رد فعل الرأي العام والشعب على الإجراءات الصعبة في 2016”.

ووجه كلمته للشعب المصري قائلًا: “بسجل احترامي وتقديري وبوجه تحية للشعب المصري، لأنه تحمل تبعات الإصلاح الاقتصادي الصعبة، مش هقول سر ولا حاجة لما كنا نناقش الموضوع ده كانت الأجهزة والوزارات متحسبة جدًا منه، ولكن كنت مراهن على الشعب المصري والمرأة المصرية، وقلت البرنامج ده هيمر والناس هتقبله وهتتحمله ولو ماكناش عملنا ده كنا هنبقى في كارثة كبيرة جدا مع جائحة كورونا، الإصلاح الاقتصادي كان الطريق الذي تحملنا من خلاله صدمة اقتصادية وصحية في مصر مع الجائحة يستحق مننا كلنا إننا لا ننام ولا نغفل إلا لما نتجاوزه بالعمل والعمل والعمل”.

تأثير جائحة كورونا على مصر غير العالم:

قال الرئيس السيسي إن تأثير جائحة كورونا على مصر غير باقى الدول، طيب هناخد الإجراءات الصحية وإرشادات منظمة الصحة العالمية أكيد، لأن دول مواطنينا وبنخاف عليهم، طيب هنعمل إجراءات احترازية ونتشدد فيها طبعا، نخفف عن الناس اللي تضررت من الجائحة مثل القطاع السياحي أكيد، واطلقنا حوافز بـ 100 مليار جنيه مع إنه كان أمر مبكر جدا، وفيه دول كتير في العالم مكنتش اتحركت، وقولنا نضخ 100 مليار جنيه للحفاظ على الشركات القائمة بالفعل وتأجيل المستحقات المطلوبة منهم شريطة عدم تسريح العمالة.

خلونا نعيش الغلابة:

قال الرئيس السيسي خلال الجلسة المخاطر اللي موجودة في أفريقيا كثيرة وبالتالى والمؤسسات الدولية والبنوك اللى بتدى قروض بتكون مخاطر الائتمان عالية.. الغنى يقدر ياخد منخفض التكلفة والعدمان مش قادر ياخد إلا بتكاليف عالية.. عمرنا كده ما هنخرج من الفقر.. بقت معادلة صعبة.. ياخد فلوس بكتير تكلفنى كتير وأعباء كتير.. وافضل مش قادر.

والشعوب مش مستحملة ده ومن حقها أنها تحلم وتبدأ تؤثر ويبقى فيه حالة عدم استقرار وفيه خراب وتدمير للدول ويطلع الإرهاب.. وتبقى فيه هجرة غير شرعية والناس عاوزه تسيب بلادها وتروح على البلاد الغنية علشان تعيش.. خلونا نعيش الغلابة شكرا جزيلا.

هنقضي على الفقر في مصر:

قال الرئيس السيسي: "هنفضل نشتغل ونشتغل حتى نخرج من الفقر في مصر مشروع حياة كريمة وكل اللى احنا بنعمله في مصر خطوة من ألف خطوة لسه هنعملها وده كلام مش معنوي".

عملنا 300 ألف وحدة على الرغم من ظروفنا المتواضعة:

قال الرئيس السيسي: الفكرة مش أني أوفر الفلوس بس أدخل كدولة بإجراءات متكاملة تحقق معادلة هذا الفقر المتعدد عندنا تعليم مش جيد وصحة مش جيدة ودخل مش جيد.. وسكن مش جيد وعملنا 300 ألف وحدة اللى بنتكلم عليهم دول كان يتم تجهيزهم وتأسيسهم في دولة ظروفها الاقتصادية متواضعة.

احنا مش من الدول الغنية لما نيجى نتكلم على الولايات المتحدة وانجلترا فرنسا دى دول غنية كدول واحنا كدولة مش قولنا المواطنين دول مش نقدر نعملهم حاجة لا الفقر ده فقرنا ونتحرك على العمل عليه وتحسين حياة المواطنين وعملنا وجهزنا شقق وفرش يليق بيهم.