وليد فواز يروى موقف إنسانى للراحل أحمد خليل

عن عمر  ناهز الـ80 عامًا، فارق الفنان الكبير أحمد خليل،  الحياةبعد صراع مع فيروس كرورنا، وتتوالى  رسائل النعى من زملائه وجمهوره.  

وروى الفنان وليد فواز قصة إنسانية له مع الفنان أحمد خليل، فى تدوينة له عبر حسابه على موقع التواصل الاجتماعى «فيس بوك».

وقال فواز :"في يوم من الأيام وأنا ممثل صغير قوى، كنت شغال في مسلسل فيه الأستاذ أحمد خليل، وكان فى مشهد المفروض إنى بقول فيه جملة وبفتح الباب واقوله - إتفضل يا باشا- وفي نفس الوقت كنت شغال فى عمل تانى وكان فيه لخبطة فى المواعيد كالمعتاد".

وتابع:"المهم قعدت اتكلم مع المخرج المنفذ وأقوله أنا مش هاعرف أجي وده مشهد مش مهم وعادي انك تشيلني، المخرج المنفذ الله اكبر عليه كان سالك قوي، قعد يقولي إزاى متجيش في مشهد فيه استاذ أحمد خليل.. دي كارثة ومصيبة وحسسني إن المسلسل هيفشل لو مجتش".

وأضاف: "كلمت الاستاذ في التليفون الو ..أستاذ احمد خليل.. أيوة.. حضرتك أنا إسمي فلان وبمثل مع حضرتك فى مسلسل كذا..أهلا يا بني..قالها بصوت كله إبوة وطيبة ودفء..شرحتله المشكلة كلها وقلتله كلام المخرج المنفذ".

وأكمل: “سمعني للنهاية من غير ما  يقاطعني وقالي يابني أنا معنديش أي مشكلة خالص، وفي يوم من الأيام أنا كنت زيك بسعي…متقلقش خالص …أنا هاقول للمخرج المنفذ ميضايقكش”.

وواصل:" في 2021 قابلت الأستاذ فى رمضان اللي فات في لبنان وقولتله- تعرف إن حضرتك ليك في رقبتي جميل كبير قوي فرق معايا في حياتي.. وحكيت القصة ..هو أبتسم وقالي شوف أنا كبرت ومش فاكر قوي التفاصيل.. لكن أنا أتربيت علي إن الناس من بعض ولبعض".