طبيب يوضح فوائد الحصول على مصل الإنفلونزا
كشف الدكتور محمد علام، نائب مدير العزل الصحي بمستشفى النجيلة، عبر صفحته على موقع التواصل الاجتماعي «فيس بوك» أهمية لقاح الإنفلونزا.
وقال: «الناس اللي بتسألنى عن لقاح الإنفلونزا مهم ولا لا.. الإنفلونزا الموسمية نسبة الوفيات مقارنة بعدد الحالات اللي بتتصاب قليلة جدا والحالات اللي بتحتاج حجز في المستشفى قليلة جدا في ناس بيكونوا عرضة للمضاعفات أكثر من غيرهم ودول يفضل ياخدوا تطعيم الإنفلونزا كل سنة لأنه بيقلل خطورتها مش بيمنعها 100٪».
وأضاف:«الأشخاص المعرضين للخطر من الإنفلونزا يفضل ياخدوا اللقاح كبار السن فوق ٦٥ سنة، أصحاب الأمراض المزمنة (القلب - الضغط - السكر - الكلى)، الحوامل، الأطفال أكبر من ٣ سنوات يفضل ياخدوه، مرضى حساسية الصدر المزمنة، مرضى نقص المناعة الإيدز، مرضي السرطان، الأطفال ذوى الاحتياجات الخاصة».
وتابع: «المشكلة بالنسبالي في الإنفلونزا الموسمية مش خطورتها قد الرعب اللي هيحصل لو شخص جاله دور إنفلونزا الفترة دي، والسبب أن أعراضها مشابهة جدا للكوفيد وبيحصل معاها التهاب رئوى بنسبة أقل من الكوفيد، وبعض المرضى بيحتاجوا حجز فى المستشفى لو حصلهم التهاب رئوى فيروسي بسبب الإنفلونزا، ومع الزيادة اللى هتحصل فى حالات الكوفيد اللى هتحتاج حجز بالمستشفيات هيحصل ضغط على المنظومة الصحية أكثر وهنا المشكلة وتانى حاجة هي أن الشخص ممكن يصاب بالإنفلونزا الموسمية والكوفيد مع بعض وهيكون الوضع بالنسباله أصعب».
