«ردينة».. متطوعة صندوق الإدمان تخوض حربا للتوعية بمخاطر التعاطي

تكتب وزارة التضامن الاجتماعي قصصًا لأبطالها على مدار أيام شهر رمضان، تلقي فيها الضوء على نماذج مشرفة من الشباب والفتيات تحت عنوان سفير التضامن.

وتقول ردينة :" أنا عندي 18 سنة متطوعة في صندوق مكافحة وعلاج الإدمان  والتعاطي، رحلتي مع التطوع في الصندوق بدأت من حوالي سنتين .. من زمان وأنا شاغلة نفسي بموضوع التدخين والإدمان.. ودائما أسأل نفسي ليه في شباب بيعملوا كده في نفسهم .. طيب ازاى أساعدهم وأبعدهم عن الطريق ده.. كنت بسمع دايما جزء من الشباب بيقول أصل الظروف هي السبب.. لكن مكنتش مقتنعة... ايه اللى يخلى إنسان  يعمل كده في نفسه بحجة الظروف؟".

وتابعت :" هنا جات لي الفرصة إني أكون متطوعة في صندوق مكافحة  وعلاج الإدمان والتعاطي..  وتعرفت على الصندوق من خلال حملة توعية كانت في مدرستي عن كيفية الوقاية من التدخين.. بدأت رحلتي وتدربت على دليل اختار حياتك علشان أكتسب مهارات التواصل مع الناس.. نزلت أماكن كتير  زي المدارس والجامعات وأحياء مختلفة زي حي الأسمرات.. كمان قدمت عرض في الجامعة البريطانية عن كل حاجة اتعلمتها من التطوع".

وأضافت هناك أساليب التوعية تختلف بين الشباب والأطفال.. مشيرة إلى أنها في الأسمرات وجدت  أطفال كثيرين يرون إن التدخين أو الإدمان أمر عادي.. ومنهم من يرى أنه عندما يفعل ذلك يكون  رجلا.. فكان كلام الأطفال بالنسبة لها كان مخيفا.. ولكن كان هذا  التحدي بالنسبة لها والذي يجب أن تخوضه وتنجح فيه.

وتواصل حديثها قائلة :" بدأت معاهم بالتوعية بمشاكل التدخين والإدمان علشان أساعدهم حياتهم تبقى أحسن.. عملنا ليهم ورش فيها حكايات وقصص زي قصة انت البطل عن بطولة محمد صلاح.. عملنا ليهم ورش فيها أنشطة زى الرسم والتلوين.. لكن نقطة التحول الأهم في حياتي حضوري منتدى الشباب الدولي في مجال الوقاية من  المخدرات.. بعد نجاحي في كل الاختبارات المطلوبة.. كانت مصر لأول مرة تلقي الكلمة الافتتاحية بعد 6 سنين.. وتم اختيار 7 فقط لإلقاء الكلمة  الافتتاحية وأنا كنت واحدة منهم".

وأوضحت ردينة أن المنتدى كان خطوة عظيمة تعلمت  منه أمورًا كتير.. منها إعداد خطة استراتيجية  للمجتمع الذي تعيش  فيه للوقاية من الإدمان.. متابعة :"أنا عايزة أقول للشباب اللى شايفين إن المشاكل هي السبب في الإدمان.. الطبيعي إنك تعدي بمشاكل.. والطبيعي انك هتخرج منها بدروس تتعلمها.. لكن المشكلة اللي بجد لما تروح لسكة ممكن تخسر بيها حياتك.. فأرجوك اختار حياتك.. "إنت أقوى من المخدرات ".