لا يقبل الرديف

الرديف، الأهلي لا يضم الرديف مطلقا، ولا يقبل الفكرة أساسا، خلينا الأول نعرف "الرديف".
دا تعبير قديم، معناه، اللاعب اللي ناديه بـ يستغنى عنه، لـ إنه شاف، إنه مسيرته كدا انتهت، سواء لـ إنه سنه كبر، أو إصابة، أو لـ تقييم فني، حسام عاشور مثلا دلوقتي رديف.
ما أفتكرش خالص في التاريخ، إنه نادي مصري استغنى عن لاعب، فـ الأهلي ضمه (بـ أقول مصري، لـ إنه الكلام لا يشمل العائدين من أوروبا)
آه، هو يضم لاعيبة من أندية تانية، في عز مسيرتها، ويتقال بقىالأهلي بـ يخطف اللاعيبة وكدا، إنما الأندية الأخرى، بـ تاخد رديف الأهلي على طول، حتى الزمالك، ياما ضم لاعيبة، الأهلي استغنى عنها، من أول أحمد عفت يا سلام، مرورا بـ جمال عبد الحميد، زكريا ناصف، محمد عبد الجليل، أيمن شوقي، حسام حسن وإبراهيم حسن، فيليكس، هشام حنفي، أحمد حسن الصقر.
وحتى أحمد الشيخ، راح مضى لولا الحملة اللي اتعملت، ومالهاش علاقة بـ إنه رديف، إنما عشان التويتة القديمة، غير كدا، كانوا هـ يضموه ويبقوا مبسوطين.
لما نروح لـ أندية المصري والاتحاد بقى، الموضوع دا بـ يتضاعف، بـ صورة أكبر كتير من المعتاد، كمية لاعيبة رديف لعبت لـ المصري والاتحاد االسكندري، أكبر من القدرة على الحصر.
ومش بس مجرد ضم لاعب رديف من الأهلي أو الزمالك، لأ، دا ممكن يضموا رديف الإسماعيلي مثلا، زي ما المصري ضم أسامة خليل كدا، أو يضم لاعب رديف الرديف.
مثلا التوأم، الأهلي استغنى عنهم، أو حصلت مشاكل، المهم مسيرتهم انتهت كدا، فـ راحوا الزمالك، قوم مسيرتهم خلصت مع الزمالك. راح المصري ضمهم، ولمامسيرتهم خلصت مع المصري، الترسانة ضم حسام حسن، ولما مسيرته خلصت مع الترسانة، الاتحاد السكندري ضمه.
حضرتك متخيل!
كان عنده وقتها 40 سنة، بس هو اللي قرر ما يلعبش، لما المصري عرض عليه يبقى مدير فني، وكان مقيد رسميا، لاعب في الاتحاد السكندري، ومدير فني لـ المصري.
الظاهرة دي في الإسماعيلي أقل من المصري والاتحاد، دول أغراب أوي يا عم الحاج: وليد صلاح وشادي محمد وكمونة وكشري، وعلاء إبراهيم وهشام حنفي ومحمد فاروق، وهلم كبيرة.
وما عندهمش مانعيضموا أي لاعب، مهما كانت حالته الفنية والبدنية، ومهما كان سنه، المهم إنه اسم ولعب لـ الأهلي أو الزمالك، خصوصا الأهلي.
يا راجل! دا مرة طقت في دماغ جوزيه، مش عارف ليه، وقال إنه عايز يضم لاعب مهاجم كبير في السن، لـ سبب مش فاهمه لـ حد دلوقتي، فـ راحوا فاوضوا عبد الحميد بسيوني، بس إدارة ناديه رفضت.
جابوا عبد الحميد حسن، ولعب شوية وخلصنا، راح الاتحاد السكندري ضمه.
اللاعيبة الرديف دي، بـ تعمل عدد ع الفاضي، مش بـ يطول طبعا في عدد المواسم، وحتى مشاركاته في الموسم، بـ تبقى غالبا قليلة.
أكيد فيه استثناءات، زي جمال عبد الحميد، وبـ درجة أقل حسام حسن، إنما الطابور الطويل العريض من اللاعبين دول، عملوا إيه؟
زكريا ناصف: موسم سجل فيه تلات أهداف، أيمن شوقي: موسم 4 إجوان، وقيس بقى على كدا. في المصري والاتحاد بقى، حاجة تحزن والله.
فـ كدا، عندنا فريقلا يعطي الفرصة لـ الشباب بـ سهولة، لا يقبل اللاعبين اللي جايين يختموا مسيرتهم، ولسه فاضل حاجات تانية، في فلسفة تكوين الفريق، فـ ابقوا معنا