مالكيشى صور عندى
مالكيشى صور عندى
غير ال مطبوعة على القلب اللى سقياه
حب من ياما سنين يا أماى..
عروسة مشيتى يامايا وسبتينا لبرد الدنيا وحدينا
بدون إنذار..
أو حتى بحضن كبير يمشينا ولو ليومين
ف وسط النار..
وعارفة كمان؟؟
حاجات ياما كتير فاتك تفرح موت
وياما حاجات يابختك إنها فاتك
تشيب موت..
أهو (مدحت)
اللى سايباه لسه ف الثانوى خلاص خلص سنين الجامعة والتجنيد..
وسابنا وسافر أمريكا مع عياله
كنك كنت دعياله مقايلاشى
ما هو البكرى وأول فرحتك يامه..
ونسختك الصغيورة
(منى).. القمرة.
والفرع اللى ملو العين وملو القلب حب وخير..
والسند اللى شايل ياما رجالة وبجناح طير
أمانة يامه تدعيلها
يصبرها اللى خالقها على فراق جوزها والشيلة اللى شايلاها
دى عندها ياما بنوتين كما القمرين
وولدين بقيوا رجالة
وبقيت جدة قال يامه..
(منى) جدة؟؟
بنيتها الكبيرة خلفت وردة
فدغرى حولتنا جدود..
يادى الأيام!!!!
اللى سارقة الخلق ببجاحة ما ليها حدود
و(مايكل)..
أحلى واد فينا سبقنا وراحلك الغالى
عشان يحكى..
يا أمى ع الكدب اللى ف الأحلام
ودنيا الغش ما ليها منين ما بتصحى
لما تنام..
صافى القلب كيف يامة حليب صابح وفجر جديد
سافر للسما طيب كما عاش وسطنا ونضيف
أمانة تطيبى خاطره وحاجى عليه
و(ريتا)..
اللى كات تحبى وكنت يا دوب أنا باشيلها
بقت أم لعيال تفرح
وزى النسمة ف الرقة
لا تجرح يوم لعود الورد
ولا تقسى على العصافير
لسة عيلة يامة ماكبرتشى
أشوفها أحس إن الدنيا فيها حاجات بتنضح خير مابيناشى
لحد ماتيجى وأشوفها.. عسل يامة
وشعرها ليلى زى شعرك تمام واصل لنص الضهر
وأنا.. يامة..
أنا الفقرى اللى بيعافر ف دنيا غافلة على عرقه
ماشيفاشى
وتلطشة لطشة مايفوقشى
مايدراشى إلا بالتانية وغيرها كتير..
شقاه أهون عليها من وقوع ورقة شجر وسط الخريف
عادى
قساوة.. مررت حلقى على الآخر
لا عارف يامة أواجهها.. ولا أتاخر
بعيد عنها..
وبعد ما كنت حالف إنى ماتجوزش
أهو أتجوزت
عطانى ربنا ولدين ملايكة بقلب بنى آدمين
أنا دلوقتى باتعلم كمان منهم
ومابعلمش..
عيال طالعانا بتعلم ماتتعلمش
يووووووووووووووه
من كتر شوقى أحكى
نسيت إنى أقولك بس ياماية
وحشتينى..
وحشتينى..
وحشتينى..
إهداء إلى أمى رحمها الله
