إنجي وجدان ردا على ريهام سعيد:" بصي لنفسك"
نشرت الفنانة الشابة إنجي وجدان فيديو على حسابها الشخصي بموقع التواصل الاجتماعي، "إنستجرام"، توجه فيه رسالة للإعلامية ريهام سعيد، بعد تطاولها على أصحاب الأجساد البدينة، ووصفهم بأنهم "عبء على الدولة، ويشوهوا المنظر، منظرك بيكون مش حلو وإنتي بالعباية أو الجلابية ومش قادرة تمشي، بتفقدي جزء من أنوثتك".
وقالت إنجى في الفيديو: " لسه متفرجة على فيديو لريهام سعيد، أنا مبحبش أتكلم عن حد ولا أعمل مشاكل مع حد، بس "ريهام" بتقول فيه إن التخان ميتين وإن هما عبء على الدولة".
وأكملت هجومها على ريهام سعيد قائلة: "أستاذة ريهام حضرتك كنتي عيانة أو معرفش، أنا واحدة تخينة ومعنديش كل المشاكل دي وغيري كتير، وكنت متعاطفة معاكي جدا لما أعلنتِ إصابتك بمرض نادر، وكنت بدعيلك، وناس كتير كانت ضدك وبقت بتدعيلك لما أعلنتي مرضك، فمش من صالحك إنك تضايقي الناس وتغلطي فيهم وتغلطي في شكلك".
واضافت: "أنا رياضية طول عمري، وتخنت، واتجوزت وجوزي رفيع وأعجب بي رغم أني تخينة، وخلي بالك في ناس مريضة وتخنت وفي ناس عندها مشكلة في الغدد، وفي ناس تخان ورياضيين وممكن يكونوا أحسن منك في الجيم، ومش من حقك تقولي التخان ميتين، أنا أهو عايشة وبمثل وبدي للناس أمل مش بكأبهُم، ودور الإنسان إنه يعطي للناس أمل، لكن لما تقولي لشخص تخين إنه ميت فإنتي كده بتقضي عليه تمامًا".
