أحمد السعدنى ناعيا طليقته: سامحينى يا حبيبة عمرى

نعى الفنان، أحمد السعدني، طليقته وأم أبناءه، أمل سليمان، التي تلقى العزاء فيها، مساء أمس الجمعة، حيث توفيت إثر تعرضها لأزمة قلبية بأحد مستشفيات أكتوبر.

وكتب أحمد السعدني، ببالغ الحزن، رسالة مؤثرة لكل جيله، عن تجربته الشخصية، فى وفاة حبيبة عمره، على حد وصفه،عبر حسابه الرسمى على موقع "فيس بوك".

وقال السعدني: "عمري في حياتي ما اتكلمت عن حياتي الشخصية لكن حسيت إني لازم أعمل كده دلوقتي، فذكر إن الذكري تنفع (المؤمنين)، أو الكافرين أو المستهبلين أو تنفع أي حد هحس إني عملت حاجة، هحاول مطولش يوم ٩ ٩ ٢٠٠٣ حب من أول نظره في الشارع ما بين معهد السينما، حيث كانت تدرس ومعهد فنون مسرحية، حيث كنت ألهو وأدرس برضه ميضرش".

ويتذكر أحمد اللقاء الأول الذي جمع بينهما: "كنت راكب عربية وكانت ماشية علة رجلها كنت هخبطها لكن حصل خير لا محصلش قوي خبطتتني هي في قلبي حب تقطيع شرايين سنة خطوبة، سنة كتب كتاب، شهر جواز خلفة ـول ولد هنا بدأت المشكلة اللي بكتب الكلام ده عشانها.. أنا زي كتير للأسف شباب anti تحمل مسئولية بص لنسب الطلاق وأنت تفهم".

ويكمل: "أنا بيجيلي أرتيكرية لما أحس أني مسئول وهي برضه حبيبتي زي بنات كتير بتقول طلقني أكتر مابتنطق اسمي كانت النتيجه في أول سنة بس حوالي 4 طلاق شفهي كل الشيوخ ساعتها قالولنا ده لعب عيال الطلاق ليه شروط زي الجواز تمام اسكت بقى لا تعالي يا عم طبق الشروط أدي أول طلقة".

ويضيف: "وحشتني وحشني حنيتها وحبها وهبلها متيجي نرجع يا بت يالا يا متخلف هوووووب جبنا تاني ولد نفس الإحساس نفس الأرتكريه بس المرادي صموووووود مش حينفع نتطلق تاني لا تصدق نفعت الجانب الأناني في شخصيتي غلبني يا عم كبر مخك وعيش حياتك المشكلة أني عمري مارتحت كنت عايز حضنها وحنيتها وهبلها بس كنت بأجل الرجوع يمكن أكبر أو أعقل أو أقدر اتحمل المسئولية بجد، حددت لنفسي سن معين أرجعلها فيه قال يعني هبقى نضجت بس ملحقتش ماتت في لحظة كانت بتكلمني قبلها بساعة ومكنتش عيانة كان عندها ضغط زي أغلب الشعب المصري الحمد لله".

وتابع: "ماتت ومشيت وقررت تسبني للأبد كنت فاكرها هتستناني ومتأكد من ده مستحيل تحب حد غيري مجاش في بالي أنها ممكن تموت دلوقتي صغيرة وأكتر واحدة في حياتي شفتها بتحب الحياة وعندها طاقة إيجابية، ماتت وسابتلي الولدين والندم".

ويختتم حديثه: "أنا متاكد أنك في الجنة رحتي للي خلقك يوم عرفة وأميرة وست البنات والستات ونضيفة وكريمة وصنتي ولادي وبيتي، بحبك يا أمل حياتي اللي اتهد وبوعدك المرادي حشيل المسئولية للأسف اتعلمت الدرس بس بعد ما اتحرمت من حنيتك وحضنك وولادك كمان اتحرموا من أحن أم ربنا يقدرني واربيهم احسن ما كنتي عايزة بحبك ومش بطلب منك غير أنك تسامحيني.. ربنا يرحمك ويرحمني ويرحم ولادنا يا حبيبة عمري الوحيدة".

وتوافد الفنانون على مسجد الشرطة بمدينة 6 أكتوبر، لتقديم واجب العزاء فى وفاة طليقة وأم أولاد الفنان أحمد السعدنى، التي توفيت إثر تعرضها لأزمة قلبية بأحد مستشفيات أكتوبر.

وحضر العزاء أحمد السقا، مى عز الدين، عزوز عادل، إيمى سالم، طارق صبرى، المخرج محمد سامى، محمد أنور، حمدى المرغنى، أوس أوس، المخرج أحمد خالد موسى، سوسن بدر، أحمد ثابت.