الثلاثاء 20 أغسطس 2019 الموافق 19 ذو الحجة 1440
ads

وطن مسنود على التراتيل

السبت 20/يوليه/2019 - 08:05 م
جريدة الدستور
عاطف الشيمى
طباعة

هرسم وش متكرمش
عنين واسعين
إيدين خضرة العروق فيها
وحاضنة رغيف بيضحك
ضحكته الحلوة
لكيس الفول
وهرسم نخلة باصة بعيد
ومنتظرة لشىء مجهول
وهرسم غيمة فرحانة
وشمس توزع الدهشة
على المنديل
وهرسم طفلة تتعلم
فـ أول حجلة ف الأولة
بجسد منحول
وحزن نحيل
وهرسم أب بيفنط حساباته
وبيخبى فـ دمعاته
وجع معلول
فـ قلب عليل
وهرسم آخر اللوحة
شمس صبية بتطبطب
على الورد اللى نام سكران
فـ حضن النيل
وهكتب تحت فـ اللوحة
وطن مسنود
على التراتيل
ads